کانسێلۆ لە نێوان ئینتەرمیلان و بەرشەلۆنە خۆی یەکلا کردووەتەوە

پەیام سپۆڕت - مەڕوان تاڵیب

جواو کانسێلۆی پۆرتوگالی لە نێوان پەیوەندیکردن بە ئینتەرمیلان و گەڕانەوە بۆ بەرشەلۆنە خۆی یەکلا کردووەتەوە.

 فابریزیۆ ڕۆمانۆ و دی ماریزیۆ ڕۆژنامەنووسی تایبەتمەند بە مێرکاتۆی یاریزانان ئاشکرای دەکات، ماوەی هەفتەیەک دەبێت ڕێککەوتن لە نێوان هەردوو یانەی ئینتەرمیلان و هیلال سەبارەت بە گواستنەوەی جواو کانسێلۆ کراوە و ڕەزامەندی بەرگریکارەکە ماوە.

هەردوو سەرچاوەکە دووپاتی دەکەنەوە، یانەی بەرشەلۆنە بەفەڕمی داوای فەڕمی خۆیان بۆ گرێبەستکردن لەگەڵ کانسێلۆ پێشکەشی یانەی هیلال کردووە، بەجۆرێک ئامادەن بەشێکی کەمی مووچەکەی دابین بکەن و گفتوگۆکان بەردەوامن.

لە کۆتایدا ئاماژە بەوە کراوە، خوودی جواو کانسێلۆ ئامادەیە ڕوو لە بەرشەلۆنە بکات و پێی باش نییە پەیوەندی بە ئینتەرەوە بکات لەکاتێکدا یانە کەتەلۆنییەکە هەبێت.

کانسێلۆ ئەم وەرزە بە ڕاهێنەرایەتی سیمیۆنی ئینزاگی تەنیا بەشداری شەش یاری کردووە و دوو گۆڵی ئەسیست کردووە و یەک گۆڵێشی تۆمار کردووە.