ڕیاڵ مەدرید بە دوو ئەگەر کار لەگەڵ ئاربیلوا دەکات

پەیام سپۆرت - بریار تەها

یانەی ڕیاڵ مەدریدی ئیسپانی شکستی یانەکە بەرانبەر ئالباسێتی لە جامی شا وەک پێوەر بۆ کارەکانی ئالڤارۆ ئاربیلوای ڕاهێنەر هەژمار ناکات، بەڵام بۆ یارییەکانی داهاتوو هەڵسەنگاندن بۆ کارەکانی ئەو ڕاهێنەرە دەکرێت.

 شکستی ڕیاڵ مەدرید بەرانبەر ئالباسێتی پلەدوو، ڕاستەوخۆ دوای شکستی کلاسیکۆی جامی سوپەر بووە جێی مشتومڕی میدیاکان، بەو پێیە کرانە دەرەوەی یانەکە لە جامی سوپەر لە یەکەم یاریی ئاربیلوای راهێنەری نوێدا بوو.

لەو بارەیەوە ڕادیۆی کادینا کۆپی ئیسپانی ڕاپۆرتێکی بڵاوکردووەتەوە و ئاشکرای دەکات، یانەی ڕیاڵ مەدرید بەرپرسیارێتی شکستی یانەکە لە جامی شا لە ئەستۆی ئاربیلوا نییە بەو پێیەی تەنیا یەک ڕۆژ ڕاهێنەر بووە، بەڵام بەرپرسانی یانەکان هیوادارن کە ئاربێلۆ بتوانێت شتەکان بگۆڕێت و سەرکەوتوو بێت لە ڕکابەریکردن بۆ لالیگا و چامپیۆنزلیگ، لەگەڵ ئەوەشدا کارەکانی ئاربیلوا بە پشتبەستن بەو شتانە هەڵدەسەنگێندرێت کە لە یارییەکانی داهاتوودا ڕوودەدات.

ڕیاڵ مەدرید پێیوایە ئەگەر ئاربیلوا نەیتوانێت دۆخی تیپەکە بەرەو باشی ببات، ئەوا پێویست ناکات تاکو کۆتای وەرزەکە بمێنێتەوە، بەڵام ئەگەر توانی تیپەکە بۆ ڕێڕەوی سەرکەوتن بگەڕێنێتەوە ئەوا لە کۆتایی وەرزدا دوور نییە گرێبەستێکی نوێ لەگەڵ واژوو بکرێت.

ئەو سەرچاوەیە باس لەوەش دەکات، لەناو یانەکەدا باوەڕێکی ڕوون هەیە زۆرێک لە بەرپرسانی یانەکە پێیانوایە کە زۆربەی یاریزانەکان باشترین ئاستی خۆیان پێشکەش ناکەن، جگە لە کۆرتوا و مباپێ، هەموو لایەک ئاگادار دەکرێنەوە کە دۆخەکە مەترسیدارە و لە یارییەکانی داهاتوو دەبێت باشترینی ئاستی خۆیان نیشان بدەن.