ئیسپانیا.. پێكدادانی دوو شەمەندەفەر گەشتە خێراکانى نێوان مەدرید و قورتوبە و ئیشبیلیەى ڕاگرت

پەیام 

لە پێكدادانی نێوان دوو شەمەندەفەری خێرادا لە ئیسپانیا، 21 كەس گیانیان لەدەست دا و 100 كەس بریندار بوون، بەوهۆیەشەوە سەرجەم گەشتە خێراکانى نێوان مەدرید و قورتوبە و ئیشبیلیەى ڕاگیرا.

بەپێی ئاژانسی ڕۆیتەرز، ڕووداوەكە لە نێوان دوو شەمەندەفەری خێرادا لە باشووری ئیسپانیا ڕوویداوە، دوای ئەوەی یەكێكیان لەسەر سكەی خۆی لای داوە و كێشاویەتی بە شەمەندەفەرەكەی دیكەدا. تۆڕی هێڵە ئاسنییەكانی ئیسپانیاش ڕایگەیاند، سەرجەم گەشت و هاتوچۆی شەمەندەفەرە خێراكانیان لە نێوان مەدرید و قورتوبە و ئیشبیلیە ڕاگرتووە.

هەروەها خزمەتگوزاریی فریاكەوتنی خێرا لە ناوچەی ئەندەلووس لە ئیسپانیا ڕایگەیاند: لە ڕووداوەكەدا 21 كەس گیانیان لەدەست داوە و زیاتر لە 100 كەس بریندار بوون، 25 كەس لەوان برینەكانیان مەترسیدارە.

بەپێی میدیاكانی ئیسپانیا یەكێك لە شەمەندەفەرەكان 300 سەرنشین و ئەوی دیكەیان زیاتر لە 100 سەرنشینی تێدا بووە.

خێزانی شاهانەی ئیسپانیا نیگەرانیی قووڵی لە ڕووداوەكە دەربڕی و سەرەخۆشیی لە كەسوكاری قوربانییەكان كرد، هەروەها پێدرۆ سانچێز، سەرۆكوەزیرانی ئیسپانیا هاوخەمیی قووڵی دەربڕی و ڕایگەیاند: بە گرنگییەكی زۆرەوە چاودێریی ڕووداوەكە دەكات.