هاكان فیدان: داواكاریی بۆ درێژكردنەوەی ئاگربەستی نێوان دیمەشق و هەسەدە هەیە

پەیام  

وەزیری دەرەوەی توركیا ئاماژەی بە ئەگەری درێژكردنەوەی ئاگربەستی نێوان حكومەتی سوریا و هەسەدە لە ماوەی گواستنەوەی داعشە دەستگیركراوەكان لە سوریاوە بۆ عێراق كرد.

هاكان فیدان، وەزیری دەرەوەی توركیا لە دیدارێكیدا لەگەڵ كەناڵی ئێن تی ڤی وڵاتەكەی، تیشكی خستە سەر دوایین گۆڕانكارییە هەرێمایەتی و نێودەوڵەتیەكان و ڕوونیشیكردەوە: داواكاریی بۆ درێژكردنەوەی ئاگربەستی نێوان حكومەتی سوریا و هەسەدە هەیە كە لە 20ی مانگ و بۆ ماوەی چوار ڕۆژ ڕاگەیەنراوە.

هەر لەو بارەوە، بەرپرسە توركییەكە وتیشی: باشترین بژاردە گواستنەوەی زیندانییەكانی داعشە لە سووریا، لەو ماوەیەشدا پێویستە هیچ پێكدادانێك ڕوو نەدات.

وەزیری دەرەوەی توركیا وتیشی: توركیا لە بنەڕەتدا نایەوێت هیچ شەڕێك هەبێت و پێویستە لایەنەكانی سوریا لەسەر مێزی دیالۆگ بە شێوەیەكی ئاشتییانە و شارستانییانە تاوتوێی چارەسەری كێشەكانیان بكەن.

لەبارەی ئەگەری هێرشی سوپای سووریا بۆ سەر هەر دوو شاری كۆبانێ و قامیشلۆ لە ئەگەری نەگەیشتن بە ڕێككەوتنی نێوان دیمەشق و هەسەدە لەماوەی ئاگربەستدا، وەزیری دەرەوەی توركیا وتی: لەئێستادا بە نێوەندگیریی ئەمریكا كار بۆ جێبەجێكردنی ڕێككەوتنی 18ی ئایار دەكرێت.