ئێران: 10 دەزگای هەواڵگریی وڵاتانی دوژمن لە پشت خۆپیشاندانەكانەوە بوون

پەیام  

سوپای پاسدارانی كۆماری ئیسلامی ئێران خۆپیشاندانەكانی وڵاتەكەی بە "ئاژاوەی ڕێكخراو" ناو دەبات و دەڵێت: دەزگای هەواڵگریی 10 وڵات لە پشت خۆپیشاندانەكانەوە بوون.

لە كۆتایی مانگی ڕابردوو زنجیرەیەك خۆپیشاندان و گردبوونەوە لە ناوچە جیاوازەكانی ئێران دەستی پێ كرد و بە هۆیەوە توندوتیژی لەنێوان خۆپیشاندەران و هێزە ئەمنییەكاندا دروست بوو، ڕاپۆرتەكانیش باس لە كوژران و برینداربوونی هەزاران خۆپیشاندەر دەكەن، سوپای پاسدارانی ئێران لە سێیەم ڕاگەیەنراویدا سەبارەت بە خۆپیشاندانەكان ڕایگەیاندووە كارمەندانی دەزگا ئەمنی و هەواڵگرییەكان مامەڵەی یەكلاكەرەوە و ئامانجداریان كردووە لەگەڵ خۆپیشاندەران كە ئەو بە "ئەندامانی دوژمن" و تۆڕە پەیوەندیدارەكان ناوی هێناوە.

سوپای پاسداران دەڵێت: 735 كەسیان دەستگیر كردووە كە ئەندامی تۆڕە هەواڵگرییەكانی دوژمن بوون، هەروەها لێپرسینەوەیان لەگەڵ 11 هەزار كەسیش كردووە كە كەسانێكی دیكە بوون و لەلایەن دەزگا هەواڵگرییەكانەوە بەكارهێنرابوون. ڕاشیگەیاندووە: 743 پارچە چەك دەستی بەسەردا گیراوە.

سوپای پاسداران بانگەشەی ئەوەشی كردووە، 46 كەس لەوانەی دەستگیر كرابوون كارمەندی دەزگای هەواڵگریی بیانی بوون و ناسنامە و ئەرك و ڕۆڵیان ئاشكرا كراوە. ڕاشیگەیاندووە: لە خۆپیشاندانەكاندا 10 دەزگای هەواڵگریی سەر بە وڵاتانی دوژمن بەشداربوون و دەستێوەردانیان كردووە.

لای خۆیەوە دەزگای مافەكانی مرۆڤی ئێران كە لایەنێكی ئۆپۆزسیۆنە ڕایگەیاندووە لە خۆپیشاندان و ناڕەزایەتییەكاندا پێنج هەزار و دوو كەس كوژراون كە 201 كەسیان سەر بە هێزە ئەمنییەكان بوون، هەروەها نزیكەی 27 هەزار كەسیش دەستگیر كراون، لە بەرانبەریشدا بەپێی ئامارەكانی دەوڵەت سێ هەزار و 117 كەس كوژراون.