وەزارەتی جەنگی ئەمریكا: ئێران سوورە لەسەر دووبارە بونیادنانەوەی توانا سەربازییەكانی

پەیام  

وەزارەتی جەنگی ئەمریكا ستراتیژی نوێی بەرگریی وڵاتەكەی بڵاو كردەوە و ڕایگەیاند: ئێران سوورە لەسەر بونیادنانەوەی هێزەكانی سەرباری شكستەكانی چەند مانگی ڕابردوو.

وەزارەتی جەنگی ئەمریكا بەڵگەنامەی ستراتیژی نوێی بەرگری بڵاو كردەوە و باسی لەوە كرد "گۆڕانكاریی لە سیاسەتی وڵات كراوە لە بواری بەرگری و كاری لەپێشینە بریتییە لە بەرپەرچدانەوەی چین و كۆریای باكوور و پاراستنی ئاسایشی ناوخۆ و كەمكردنەوەی دەستێوەردانی دەرەكی و سوپای ئەمریكا پشتیوانی سنووردار پێشكەشی هاوپەیمانان دەكات".

لە بەڵگەنامەی ستراتیژی بەرگری ئەمریكادا هاتووە: ئێران سوورە لەسەر دووبارە بونیادنانەوەی هێز و توانا سەربازییەكانی، سەركردایەتی ئێران دەرگای لە بەردەم ئەگەری ئەوەی جارێكی دیكە هەوڵی بەدەستهێنانی چەكی ئەتۆمی بدرێت، بەكراوەیی هێشتووەتەوە.

وەزارەتی جەنگی ئەمریكا دەڵێت: پێشبینی دەكرێت بریكارەكانی ئێران هەوڵی بونیادنانەوەی ژێرخان و تواناكانیان بدەن و تاران و بریكارەكانی قەیرانی هەرێمایەتی دروست دەكەن كە هەڕەشە لە ژیانی سەربازانی ئەمریكا و تێكدانی ئاشتی دەكات.