لە سەرەتای وەرزی زستانەوە 11 منداڵ لە غـ.ەززە بەهۆی سەرماوە گیانیانلەدەستداوە

پەیام 

ڕێكخراوی نەتەوە یەكگرتووەكان ئاماری ئەو منداڵانەی بەهۆی سەرماوە لە كەرتی غەززە گیانیان لەدەست داوە ئاشكرا كرد و ڕایشیگەیاند: خێزانەكانی غەززە بەهۆی سەرماو سۆڵەوە لە دۆخێكی ناهەمواردان.

فەرحان حەق، جێگری وتەبێژی سكرتێری گشتی نەتەوە یەكگرتووەكان لە كۆنفراسێكی ڕۆژنامەوانیدا ڕایگەیاند: لە نوێترین حاڵەتدا منداڵێك لە كەرتی غەززەی فەڵەستین بەهۆی سەرماوە گیانی لەدەست داوە و بەمەش ئاماری گشتی ئەو منداڵانەی لە سەرەتای وەرزی زستانی ئەمساڵەوە بەهۆی سەرماوە ڕەقبوونەتەوە گەیشتووەتە 11 منداڵ.

فەرحان حەق ڕایشیگەیاند: خێزانەكانی غەززە لە دۆخێكی ناهەمواردان بەهۆی كەشوهەوای سەختی زستان و نەتەوە یەكگرتووەكان و هاوبەشەكانیشی دەیان هەزار خێمەیان دابەشكردووە و پەناگەیان بۆ زیاتر لە نیو ملیۆن كەس دابین كردووە، بەڵام ئەو خێمانە پارێزگاری سنوورداری دابینكردووە.

ئەو بەرپرسەی نەتەوە یەكگرتووەكان جەختی كردەوە لە پێویستی بەردەوامبوونی گەیشتنی هاوكاری و یارمەتیەكان بۆ غەززە بەبێ كۆت و بەند و داواشی لە ئیسرائیل كرد كۆت و بەندی سەر ڕێكخراوەكان و تیمەكانی بەهاناوەچوون لاببات.

لەلایەكی دیكەوە، بەرەبەیانی ئەمڕۆ لە ئاكامی هێرشێكی ئاسمانیی سوپای قەوارەی زایۆنی بۆ سەر چەند ناوچەیەكی كەرتی غەززە 19 كەس شەهید بوون كە حەوتیان ئەندامی یەك خێزان بوون.