پرسی هەڵبژاردنی سەرۆككۆمار بە هەڵپەسێردراوی ماوەتەوە و شاندێکى شیعەش دەگاتە هەرێم

پەیام 

هێشتا پرسی هەڵبژاردنی سەرۆككۆماری عێراق بە هەڵپەسێردراوی ماوەتەوە، ئەمڕۆیش شاندێكی شیعەكانی عێراق سەردانی هەرێمی كوردستان دەكەن و تاوتوێی پرسی سەرۆككۆمار دەكەن.

بەهۆی ڕێكنەكەوتنی لایەنەكان لەسەر كاندیدی هاوبەش، دوێنێ پەرلەمانی عێراق نەیتوانی كۆببێتەوە و پرسی سەرۆككۆمار یەكلا بكاتەوە، بەو هۆیەوە دانیشتنەكەی دواخست، ئەمڕۆش بڕیارە شاندێكی چوارچێوەی هەماهەنگی سەردانی شارەكانی هەولێر و سلێمانی بكات و لەگەڵ مەسعوود بارزانی، سەرۆكی پارتی و بافڵ تاڵەبانی، سەرۆكی یەكێتی كۆ ببنەوە.

هەرچەندە میدیای عێراق باسیان لەوە كردووە ئامانجی سەردانی چوارچێوەی هەماهەنگی یەكلاكردنەوەی پرسی سەرۆككۆمار و لەیەكنزیككردنەوەی پارتی و یەكێتییە بۆ دیاریكردنی كاندیدی هاوبەش بەلام بەپێی زانیارییەكان ئامانجێكی سەرەكیی سەردانی شیعەكان، تاوتوێكردنی كاردانەوەكانی ئەمریكایە سەبارەت بە كاندیدكردنی نووری مالیكی بۆ پۆستی سەرۆكوەزیرانی عێراق.

ئەمریكا تا ئێستا كاندیدكردنی مالیكی ڕەت دەكاتەوە، شیعەكانیش سوورن لەسەر ئەوەی بەهۆی فشاری دەرەكییەوە كاندیدەكەیان ناگۆڕن. 

هەر لەو چوارچێوەیەشدا دوێنێ كاربەڕێكەری باڵیۆزخانەی ئەمریكا لە عێراق و كونسوڵی گشتیی ئەمریكا لە هەرێمی كوردستان سەردانی مەسعوود بارزانییان كرد. بەپێی ڕاگەیەنراوی فەرمی، لە كۆبوونەوەكەجا هەڵوێستیی فەرمیی واشنتۆنیان لەبارەی مالیكییەوە بە بارزانی ڕاگەیاندووە و جەختیان لەوە كردووەتەوە پێویستە حكومەتێكی سەربەخۆ لە عێراق پێكبهێنرێت كە سەروەریی وڵاتەكە بپارێزێت و خۆی لە گرژییەكانی ناوچەكە بەدوور بگرێت.