2 کاتژمێر پێش ئێستا
65 جار خوێنراوەتەوە
گەڕێکى نوێى دانوستانەکانى ئەمریکا و ئێران سەرەتای هەفتەی داهاتوو دەستپێدەكەنەوە
پەیام
سەرۆكی ئەمریكا وادەی گەڕی دووەمی دانوستانە ئەتۆمییەكانی لەگەڵ ئێران ئاشكرا كرد و هۆشداریی توندیشی لە شكستهێنانی دا.
دۆناڵد ترەمپ، سەرۆكی ئەمریكا لەسەر فڕۆكەی سەرۆكایەتی "ئێر فۆرس وەن" لە كاتی گەشتكردنی بۆ ویلایەتی فلۆریدا قسەی بۆ ڕۆژنامەنووسان كرد و ڕایگەیاند: واشنتۆن دانوستانی "زۆر باشی" لەگەڵ تاران ئەنجام داوە و ئێران بە جددی خوازیاری گەیشتنە بە ڕێككەوتن.
ترەمپ ئاماژەی بەوە كرد، كە ئەمریكا لەژێر فشاری كاتدا نییە بۆ ئەنجامدانی دانوستانەكان و كاتی تەواوی لەبەردەستە، بەڵام جەختی كردەوە، كە بە هیچ شێوەیەك ڕێگە نادەن ئێران ببێتە خاوەنی چەكی ئەتۆمی.
سەرۆكی ئەمریكا ئاشكرایشی كرد كە گەڕێكی نوێی كۆبوونەوەكان لەگەڵ ئێران سەرەتای هەفتەی داهاتوو دەست پێ دەكەنەوە.
هاوكات لەگەڵ ئاڕاستە دیپلۆماسییەكەدا، ترەمپ جارێكی دیكە هەڕەشەی بژاردەی سەربازی كرد و ڕایگەیاند: كەشتیگەلێكی جەنگیی گەورە بەرەو ناوچەی ڕۆژهەڵاتی ناوەڕاست بەڕێكەوتووە و بەم زووانە دەگاتە ئەوێ، دەبینین كارەكان بە چ ئاراستەیەكدا دەڕۆن و هۆشدارییشی لە لێكەوتەكانی شكستهێنان لە گەیشتن بە ڕێككەوتن دا.
دوێنێ هەینی دانوستانی ناڕاستەوخۆی نێوان ئەمریكا و ئێران لە مەسقەتی پایتەختی عمان بەڕێوە چوو، ئەمەش یەكەمین خولی گفتوگۆكان لەو كاتەوەی ئەمریكا لە مانگی حوزەیرانی ساڵی ڕابردوو لە میانی جەنگی 12 ڕۆژەی قەوارەی زایۆنی بۆ سەر ئێران هێرشی كردە سەر پێگە سەرەكییەكانی بەرنامەی ئەتۆمیی ئێران.
لە تۆڕە کۆمەڵایەتیەکان شەیری بکە