كشتوكاڵی عێراق: هەندێك بەرهەم لە كوردستانەوە دێت كە هی خۆیان نییە و دەرەكییە

پەیام 

وەزارەتی كشتوكاڵی عێراق ڕەتیكردەوە پێناسی گومرگیی نوێ بەرهەمە كشتوكاڵییەكان بگرێتەوە و ڕایشیگەیاند: ڕێوشوێنی توند بۆ نووسراوی گواستنەوە لە هەرێمی كوردستانەوە دەگرینە بەر. 

ئەمڕۆ هەینی، مەهدی سەهەر جبووری بریكاری وەزارەتی كشتووكاڵی عێراق رایگەیاند: وەزارەت ڕۆژانە لیستێكی وردی نرخی بەرهەمە كشتوكاڵی و ئاژەڵییەكان بڵاو دەكاتەوە (بە جیاكردنەوەی ناوخۆیی و هاوردە) بۆ ئەوەی هاووڵاتییان لە نرخە ڕاستەقینەكان ئاگادار ببنەوە.

وەزارەتی كشتوكاڵ بۆ پاراستنی بەرهەمی ناوخۆیی ئاماژەی بە چەند ڕێكارێكی نوێ كرد و ڕایگەیاند: ڕێكاری توند بەرانبەر قاچاخچییەكان بۆ ڕێگری لە هاتنی كاڵای نایاسایی دەگیرێتە بەر و چاودێرییەكی وردی نووسراوی گواستنەوە لە هەرێمی كوردستانەوە دەكرێت.

بریكاری وەزارەتی كشتووكاڵی عێراق ڕایشیگەیاند وەزارەت تێبینی كردووە هەندێك كاڵای وەك (سێوی زەرد، كیوی و، مۆز) لە هەرێمی كوردستانەوە ڕەوانەی ناوەڕاست و باشوور دەكرێن كە بەرهەمی هەرێم خۆی نین، بۆیە ڕێگری لە تێپەڕبوونیان دەكرێت، بۆیە داوا لە لایەنە پەیوەندیدارەكانی هەرێم كراوە پابەندی "ڕۆژژمێری كشتوكاڵی" بن بۆ ئەوەی مافی جوتیاران لە هەموو عێراق پارێزراو بێت.