هێزى ئاسمانى ئیسرائیل گەیاندنی خواردنی بۆ ناو بنكە سەربازییەكانى قەدەغە دەکات

پەیام

لە ترسی ئاشكرابوونی ئامادەكارییە سەربازییەكان بۆ هێرشكردنە سەر ئێران، قەوارەی زایۆنی بڕیارێكی نائاسایی بۆ سەربازەكانی لە تەلئەبیب دەركرد و گەیاندنی خواردنی لە ڕێگەی ئەپڵیكەیشنەكانەوە بۆ ناوەوەی بنكەكان قەدەغە كرد.

هێزی ئاسمانیی قەوارەی زایۆنی ڕێنماییەكی نوێی بۆ ئەو سەربازانە دەركرد كە لە كۆمەڵگەی كیریا لە ناوەندی تەلئەبیب كار دەكەن.

بەپێی ڕێنماییەكە، سەربازان چیتر بۆیان نییە خواردن لە ڕێگەی ئەپڵیكەیشنەوە ڕاستەوخۆ بۆ ناوەوەی بنكەكە داوا بكەن، بەڵكو دەبێت لەگەڵ نوێنەری گەیاندنەكە لە خاڵێكی دەرەوەی سەربازگەكەدا كۆببنەوە.

میدیاكانی زایۆنی ئاماژەیان بەوە كردووە، ئەم هەنگاوە لەبەر هۆكاری ئەمنییە؛ چونكە زیادبوونی كتوپڕی داواكاریی خواردن لە شەوێكی دیاریكراودا، دەبێتە ئاماژەیەكی ڕوون بۆ بوونی چڕیی سەربازان و ئامادەكاریی بۆ ئۆپەراسیۆنێكی گەورە، وەك هێرش بۆ سەر ئێران.

ئەم تیۆرییە لە ئەمریكا بە پێوەری پیتزای پنتاگۆن دەناسرێت، كە تێیدا چاودێران لە ڕێگەی زیادبوونی فرۆشی پیتزا لە دەوروبەری وەزارەتی بەرگری، پێشبینی ڕووداوە نێودەوڵەتییە گەورەكان دەكەن پێش ئەوەی بە فەرمی ڕابگەیەنرێن.

پێشتریش لە مانگی حوزەیرانی ڕابردوو، بەهۆی زیادبوونی داواكاریی پیتزا لە واشنتن، پێشبینی هێرشێكی قەوارەی زایۆنی كرابوو پێش ئەوەی ئەنجام بدرێت.