عێراق: هێرشی ناڕەوای سەر ئێران سەركۆنە دەكەین

پەیام

فەرماندەی گشتی فەرماندەیی ئۆپڕاسیۆنە هاوبەشەكانی عێراق هۆشداری لە دەرئەنجامەكانی دەستدرێژی و پەلامار بۆ سەر وڵاتەكەی دەدات.

ئەمڕۆ شەممە، لە بارەگای فەرماندەیی ئۆپڕاسیۆنە هاوبەشەكان، محەمەد شیاع سودانی، فەرماندەی گشتیی هێزە چەكدارەكانی عێراق سەرپەرشتی كۆبوونەوەی سەركردە سەربازی و ئەمنییەكانی كرد. 

بەپێی ڕاگەیەنراوی كۆتایی، لە كۆبوونەوەكەدا جەخت لەسەر پێویستی وەستاندنی دەستبەجێی هێرش و ئۆپڕاسیۆنە سەربازییەكان و گەڕانەوە بۆ گفتوگۆ كرایەوە.

لە بەشێكی ڕاگەیەنراوەكەدا ئاماژە بەوەش كراوە "لە كۆبوونەوەكەدا هەڵوێستی عێراق بە ڕەتكردنەوەی لۆژیكی شەڕ و دەستدرێژی بە هەموو شێوەكانییەوە دووپات كرایەوە" و هێرشی ناڕەوای سەر سەروەری و دامەزراوە دەستوورییەكانی كۆماری ئیسلامیی ئێران سەركۆنە كرد.

لە درێژەی بەیاننامەكەدا ئاماژە بەوە كراوە "لە كۆبوونەوەكەدا ئیدانەی هێرشی ناڕەوا بۆ سەر كۆماری ئیسلامی ئێران و هەموو ئەو هێرشانەی كردە ئامانجی گەل و سەروەری و دامەزراوە دەستوورییەكانی ئێران كرا".

لە كۆبوونەوەكەدا هۆشداریی لە هەر پێشێلكارییەكی سەروەری و ئاسمان و خاكی عێراق، یان بەكارهێنانیان وەك ڕێڕەو، یان خاڵی دەستپێكردنی هێرش بۆ سەر ئێران دا و بەكارهێنانی خاكی عێراق، یان ئاوەكانی بۆ ڕاكێشانی عێراق بۆ نێو ململانێكان ڕەت كردەوە.