هێرشەكانی ئەمریكا و ئیسرائیل زیانێكی گەورەیان بە ئێران گەیاندووە

پەیام 

بەپێی وێنەكانی مانگە دەستكردەكان، هێرشە ئاسمانییەكان بۆ سەر ئێران بنكە سەربازیی و ئەمنی و مووشەكییەكان و پیشەسازیی بەرگری گرتووەتەوە و زیانێكی زۆری پێ گەیشتووە.

وێنەی مانگە دەستكردەكان ئاستی ئەو هێرشە ئاسمانییانە دەردەخات كە بنكە سەربازیی و ئەمنییەكانی ئێرانی لە سەرتاسەری ئەو وڵاتە گرتووتەوە و بنكەی مووشەكی و كۆمەڵگەی پیشەسازیی بەرگری و بنكەی ئەمنی كراونەتە ئامانج و زیانێكی زۆریان بەر كەوتووە.

هێرشە ئاسمانییەكان بۆ سەر ئێران سێ ئاستی سەرەكی ژێرخانی سەربازیی ئێرانی گرتووەتەوە، ئەوانیش بەرنامەی مووشەكی، پیشەسازیی بەرگری و بنكەی سەركردایەتی ئەمنییە.

بەپێی شیكاری وێنەی مانگە دەستكردەكان دەركەوتووە زیانی گەورە بەو سێ دامەزراوە سەرەكییەی ئێران كەوتووە و بنكەی مووشەكیی تەبرێز ڕووبەڕووی هێرشێكی چڕوپڕ بووەتەوە و زیانی گەورەی بەر كەوتووە و نیمەچە وێران بووە، كۆمەڵگەی پیشەسازیی بەرگری بارشین لەگەڵ بارەگای فەرماندەیی هێزی ئاسایشی ناوخۆش لە تاران زیانی گەورەیان بەر كەوتووە.