كۆمەڵەی وڵاتانی جی حەوت داوای ڕاگرتنی هێرشەكانی ئێران دەكەن

پەیام

وەزیرانی دەرەوەی وڵاتانی كۆمەڵەی حەوت داوای وەستاندنی دەستبەجێ و بێ مەرجی هێرشەكانی ئێرانیان بۆ سەر وڵاتانی ڕۆژهەڵاتی ناوەڕاست كرد.

لە ڕاگەیەندراوێكی هاوبەشدا كۆمەڵەی وڵاتانی حەوت كە لەلایەن حكومەتی بەریتانیاوە بڵاو كراوەتەوە، هێرشەكانی تاران بۆ سەر ژێرخانە مەدەنی و وزەییەكانی وڵاتانی عێراق، سعودیە، ئوردن، و ئیمارات بە توندی سەركۆنە كراوە و داوای دەستبەجێ ڕاگرتنی دەكەن.

وڵاتانی ئەندام داوای پاراستنی ڕێڕەوە ئاوییە گرنگەكانی وەك گەرووی هورمز و دڵنیابوونەوە لە سەقامگیریی بازاڕەكانی وزە و زنجیرەی دابینكردنی كاڵاكانی جیهانی دەكەن.

هەروەها وەزیرانی دەرەوەی ئەم حەوت وڵاتە دووپاتیان كردەوە، پێویستە بە شێوەیەكی جیدی ڕێگری لە ئێران بكرێت بۆ بەدەستهێنانی چەكی ئەتۆمی. ئەوان ئاماژەیان بەوەش كرد، دەبێت تاران بەزوویی كۆتایی بە بەرنامەی موشەكیی بالیستی و هەموو ئەو چالاكییە ناسەقامگیرانەكانی بهێنێت، كە بە وتەی ئەوان ئاشتیی نێودەوڵەتی و سەقامگیریی گشتگیری ناوچەكەی خستووەتە مەترسییەوە.