ڤینیسیۆس قسە لەسەر شێوازی بردنەوەی مۆندیال بۆ بەڕازیل دەکات

پەیام سپۆڕت - مەڕوان تاڵیب

ڤینیسیۆس جۆنیۆری هێرشبەری ڕیاڵ مەدرید پێیوایە هەڵبژاردەی بەڕازیل بۆ بردنەوەی جامی جیهانی پاڵێوراو نییە.

 لەمیانەی ئەنجامدانی کۆنگرەیەکی ڕۆژنامەوانیدا، سەرەتا ڤینی وتی: مایەی شانازی و خۆشحاڵییە لەژێر دەستی ئانچلۆتی م ڕاهێنان بکەم، کاتێک لە ڕیاڵ مەدرید بووم و ئەگەری هاتنی ئەو بۆ هەڵبژاردەی بەڕازیل دروست بوو، بیرۆکەکەم زۆر بەدڵ بوو، چونکە دەمویست لەگەڵیدا کار بکەمەوە، بە هاتنی ئەو بیرۆکەی ڕوونترمان لەسەر شێوازی یاریکردن بۆ دروست بووە و فشارەکان لەسەرمان کەمی کردووە و دەمانەوێت بەڕازیل بگەڕێتەوە بۆ لووتکە.

هێرشبەرەکە هیوادارە ئەوەی ئێستا لەگەڵ ڕیاڵ مەدرید پێشکەشی دەکات، لەگەڵ هەڵبژاردەکەشی ئەنجامی بدات، پێشیوایە بەڕازیل بۆ بردنەوەی مۆندیال پاڵێوراوەی سەرەکی نییە، بەڵام درێسی بەڕازیل قورسایی مێژووی خۆی هەیە و دەتوانن لە ڕێگەی تۆپە وەستاوەکانەوە یارییەکان یەکلا بکەنەوە و بەو شێوەش نازناوەکە دەبرێتەوە.

ڤینسیۆس ئاماژە بەوەش دەکات، بیر لە چوون بۆ خولی ئەمریکی ناکاتەوە و تەنیا شتێک کە بیری لێدەکاتەوە یاریکردنە بۆ ڕیاڵ مەدرید بۆ ماوەیەکی زۆر درێژ.

لە کۆتایدا جۆنیۆر ئەوە دەخاتەڕوو، ساڵی ڕابردوو ئەگەر ڕافینیا باشترین یاریزان نەبووبێت، ئەوا دووەم یاخوود سێیەم باشترین یاریزانی جیهان بووە، هیواداریشە نێماڕ بە تەواوی ئامادە بێت و بانگهێشتی مۆندیال بکرێت، چونکە ئەو نموونەی باڵای یاریکردنییەتی.