نەتەنیاهوو: ئاگربەست لەگەڵ ئێران؛ لوبنان ناگرێتەوە

پەیام
بنیامین نەتانیاهۆ، سەرۆکوەزیرانی ئیسرائیل، پشتیوانی وڵاتەکەی بۆ بڕیارەکەی تڕەمپ سەبارەت بە ڕاگرتنی هێرشە ئاسمانییەکان بۆ سەر ئێران ڕاگەیاند، بە مەرجێک "تاران چیتر هەڕەشەی ئەتۆمی و تیرۆریستی نەبێت"، جەختیشی کردەوە کە ئەم ئاگربەستە لوبنان ناگرێتەوە. 
لە نوێترین پێشهاتی سیاسیی ناوچەکەدا، بنیامین نەتانیاهۆ، سەرۆکوەزیرانی ئیسرائیل، ڕایگەیاند کە وڵاتەکەی پاڵپشتی لە بڕیارەکەی دۆناڵد تڕەمپ دەکات بۆ ڕاگرتنی کاتیی هێرشە ئاسمانییەکان دژی ئێران بۆ ماوەی دوو هەفتە. ئەم هەڵوێستەی تەلئەبیب وەک هەنگاوێکی هەماهەنگ لەگەڵ واشنتن لێکدەدرێتەوە بۆ تاقیکردنەوەی دەرفەتە دیپلۆماسییەکان. 
نەتانیاهۆ ئاماژەی بەوە کرد کە ئیسرائیل هاوکاری هەوڵەکانی ویلایەتە یەکگرتووەکانی ئەمریکایە بۆ دەستەبەرکردنی ژینگەیەکی ئارام، بە شێوەیەک کە ئێران چیتر مەترسی بێت بۆ سەر ئەمریکا، ئیسرائیل و وڵاتانی دراوسێ. ئەمەش لە ڕێگەی ڕێگریکردن لە پەرەپێدانی چەکی ئەتۆمی، بەرنامەی موشەکی بالیستی و کۆتاییهێنان بەو چالاکییانەی کە بە "تیرۆریستی" وەسفی کردن. 
بەگوێرەی ڕاگەیەندراوێکی فەرمی نووسینگەی سەرۆکوەزیران، واشنتن دڵنیایی داوەتە تەلئەبیب کە لە دانوستانەکانی داهاتوودا پابەند دەبێت بە بەدیهێنانی ئەم ئامانجانە. هاوکات نەتانیاهۆ خاڵێکی جەوهەریی خستە ڕوو و ڕایگەیاند کە ئەم ڕێککەوتنی ڕاگرتنی تەقەی کاتییە، بە هیچ شێوەیەک بەرەی لوبنان ناگرێتەوە و ئۆپراسیۆنەکان لەوێ بەردەوام دەبن. 
لەلایەکی دیکەوە، تۆڕی هەواڵی "سی ئێن ئێن" لە زاری بەرپرسێکی کۆشکی سپییەوە پشتڕاستی کردەوە کە ئیسرائیل ڕەزامەندی نیشانداوە لەسەر ئەم ئاگربەستە کاتییە لەگەڵ ئێران، ئەمەش دوای ئەوە دێت کە فشارە نێودەوڵەتییەکان بۆ کەمکردنەوەی پەرەسەندنە سەربازییەکان لە ڕۆژهەڵاتی ناوەڕاست زیادیکردووە.