پاكستان ڤیزا لەسەر سەرجەم شاندەكان و ڕۆژنامەنووسانی بیانی هەڵدەگرێت

پەیام

پاكستان بڕیاری دا ڤیزای پێشوەختە لەسەر تەواوی شاندەكان و ڕۆژنامەنووسان هەڵبگرێت كە بۆ بەشداریكردن لە دانوستانەكانی ئاشتی ڕوو لە ئیسلام ئاباد دەكەن. 

محەممەد ئیسحاق دار، وەزیری دەرەوەی پاكستان ئەمڕۆ هەینی ڕایگەیاند، وڵاتەكەی پێشوازییەكی گەرم لە تەواوی شاندەكانی بەشداربووی كۆبوونەوەكانی ئیسلام ئاباد دەكات و بڕیارەكەیان ڕۆژنامەنووسانی بیانیش دەگرێتەوە. 

وەزیرەكەی پاكستان ئاماژەی بەوە دا، دامەزراوەكانی سەر بە وەزارەتەكەی و دەزگا حكومییەكان و سەرجەم هێڵە ئاسمانییەكان ئاگادار كراونەتەوە ڕێگە بەو گەشتیارانە بدەن بەبێ ڤیزا سەر فڕۆكەكان بكەون و لەناو فڕۆكەخانەكاندا كارە پێویستەكانیان بۆ بكەن.

وەزارەتی دەرەوەی پاكستان ڕاشیگەیاندووە: ئەم ئاسانكارییە لە چوارچێوەی پەرۆشیی پاكستاندایە بۆ مسۆگەركردنی بەشدارییەكی بەرفراوانی نێودەوڵەتی و میدیایی لەو دانوستانە گرنگانەی كە بڕیارە چارەنووسی ناوچەكە دیاری بكەن. 

ئەم هەنگاوە لە كاتێكدایە كە حكومەتی پاكستان هەوڵ دەدات وەك نێوەندگیرێكی سەرەكی و یاریزانێكی چالاك لە پرسی ئاسایش و سەقامگیریی هەرێمیدا دەربكەوێت و، لەو چوارچێوەیەشدا میوانداریی دانوستانی ئاشتییانەی نێوان ئەمریكا و ئێران دەكات.