كەشتییەكی نەوتهەڵگری ئێرانی گەمارۆ توندە دەریاییەكانی ئەمریكاى تێپەڕاند

پەیام

سەرەڕای گەمارۆ توندە دەریاییەكانی ئەمریكا بۆ سەر بەندەرەكانی ئێران لە ناوچەكەدا، بە مەبەستی ڕێگریكردن لە هەناردەی سووتەمەنی، كەشتییەكی نەوتهەڵگری ئێرانی، كە بڕی یەك ملیۆن و 900 هەزار بەرمیل نەوتی هەڵگرتبوو، توانیویەتی گەمارۆ دەریاییەكانی ئەمریكا تێپەڕێنێت.

بەپێی زانیارییەكانی بنكەی "تانكەر تراكەرز" و شیكردنەوەی داتاكانی "مارین ترافیك"، لە 13ی نیسانەوە كە گەمارۆی ئەمریكا دەستی پێكردووە، 81 كەشتی لە كۆی 145 كەشتی توانیویانە بە گەرووی هورمزدا تێپەڕن، ئەم ژمارەیەش نزیكەی 56%ی ئەو كەشتییانە پێكدەهێنێت، كە پێویست بوو ڕێگرییان لێبكرێت، ئەوەش ئاستەنگییە گەورەكانی بەردەم جێبەجێكردنی بڕیارە سیاسی و سەربازییەكانی ئەمریكا لە دەریاكاندا بە ڕوونی نیشان دەدات.

لە نێو ئەو كەشتییانەی گەمارۆكەیان شكاندووە، 53 دانەیان ڕاستەوخۆ پەیوەندییان بە بەندەرەكانی ئێرانەوە هەبووە یان ئاڵای ئەو وڵاتەیان هەڵكردووە. هەروەها 11 لەو كەشتییانە پێشتر ناویان لە لیستی سزاكانی ئەمریكادا هەبووە، بەڵام توانیویانە بێ گوێدانە هۆشدارییەكان ئەركەكانیان جێبەجێ بكەن و بگەنە ناوچەكانی ڕۆژهەڵات، ئەمەش ئاماژەیە بۆ شكستی ستراتیژییەتی واشنتۆن لە ناوچەكەدا.