كارنامەكەی زەیدی جەخت لە چارەسەركردنی كێشەكانی هەرێم دەکاتەوە

پەیام

سەرۆكوەزیرانی ڕاسپێردراو، لە كارنامەی حكومەتەكەی جەختی لە چارەسەركردنی كێشەكانی نێوان بەغدا و هەولێر لەسەر بنەمای دەستوور كردووەتەوە.

بەپێی ئەو زانیارییانەی ماڵپەڕە هەواڵییە عێراقییەكان لەبارەی ناوەڕۆكی كارنامەی حكومەتەوە ئاشكرایان كردووە، باس لەوە دەكەن كە عەلی زەیدی، سەرۆكوەزیرانی ڕاسپێردراوی عێراق، لە بڕگەكانی ئەم كارنامەیەدا، بەشێكی بەرچاوی بۆ دۆسیەی ڕێكخستنەوەی پەیوەندییەكانی نێوان بەغدا و هەولێر تەرخان كردووە. 
ئەوەیش بڵاو كراوەتەوە، كە زەیدی بەڵێنی داوە لە ڕێگەی چوارچێوە دەستووری و یاساییەكانەوە كار بۆ كۆتاییهێنان بە كێشە هەڵپەسێردراوەكانی نێوان حكومەتی فیدراڵی و هەرێمی كوردستان بكات، بەتایبەت لە بوارەكانی نەوت، دارایی و كارگێڕی.

هەروەها لە كارنامەكەدا جەخت لەوە كراوەتەوە، كە چارەسەركردنی ئەم ناكۆكییانە لە ڕێگەی گفتوگۆی بنیاتنەرەوە دەبێت، كە ئامانج لێی گرەنتیكردنی هاوبەشیی ڕاستەقینە و هاوسەنگییە لە نێوان پێكهاتەكاندا. 

هاوكات بەپێی كارنامەكە باس لە چاكسازیی ئابووری، بەهێزكردنی سەقامگیریی ئەمنی، بەرەنگاربوونەوەی ئاستەنگە داراییەكان، پەرەپێدانی خزمەتگوزارییەكان، ڕووبەڕووبوونەوەی گەندەڵی و فراوانكردنی سەرچاوەكانی داهات دەكات.