پێدانى کارەبا لە عێراقدا کەمی کردووە و وەزارەتى کارەباش دەڵێت؛ زیادەڕۆیی هەیە

پەیام
وەزارەتی کارەبای عێراق کەمبوونەوەی کاتژمێرەکانی پێدانی کارەبا لە بەغدا و پارێزگاکان بۆ گرفتی تەکنیکی و، کەمیی غازی هاوردەکراو و زیادەڕۆییەکانی سەر تۆڕی کارەبا دەگەڕێنێتەوە و پلانێکی فریاگوزاریش ڕادەگەیەنێت. 
هاوکات لەگەڵ هاتنی وەرزی گەرما و زیادبوونی فشاری سەر تۆڕەکانی کارەبا، لە دوو ڕۆژی ڕابردوودا بەغدای پایتەخت و چەند پارێزگایەکی دیکە تووشی پچڕانی بەردەوام و ناسەقامگیریی کارەبای نیشتمانی بوونەتەوە. 
ئەحمەد مووسا عەبادی، وتەبێژی فەرمیی وەزارەتی کارەبا ڕایگەیاند، سەرپێچی و ڕاکێشانی هێڵی کارەبا بە زیادەڕۆیی، کاریگەریی نەرێنیی قورسی لەسەر کارایی تۆڕەکانی دابەشکردن داناوە و دادپەروەریی لە پێدانی کارەبادا نەهێشتووە، ئەمەش هۆکارێکی سەرەکیی کەمبوونەوەی کاتژمێرەکانی پێدانی کارەبایە. 
بۆ چارەسەرکردنی ئەم دۆخە، وەزارەتی کارەبا دەستی بە نۆژەنکردنەوەی تۆڕەکان و ئەو (محاویلانه) کردووە کە بەردەوام تووشی لەکارکەوتن دەبن، ئەمەش بە ئامانجی گەڕانەوەی دۆخی کارەبا بۆ شێوازی ئاسایی خۆی و زیادکردنی کارایی وزە لەو ناوچانەی کێشەیان هەیە. هەروەها وەزارەت کار لەسەر دانانی محاویلەی نوێ دەکات بۆ چارەسەرکردنی لۆدی زۆر و باشترکردنی کوالیتی کارەباکە. 
وتەبێژی وەزارەت ئاماژەی بەوەش کرد، بە هەماهەنگی لەگەڵ لایەنە ئەمنییەکان کەمپینێکی بەرفراوانیان بۆ بڕینی کارەبای زیادەڕۆ و نایاسایی لە سەرانسەری وڵاتدا دەست پێ کردووە. ئەم کەمپینانە لەمەودوا بە شێوەی خولی و بەردەوام دەبن، بەتایبەت لەگەڵ هاتنی وەرزی هاویندا.