سی ئێن ئێن: ئێران به‌خێراییه‌كی چاوه‌ڕواننه‌كراو تواناكانی خۆی بونیات ده‌نێته‌وه‌

تۆڕی میدیایی "سی ئێن ئێن" لە زاری سەرچاوەکانی هەواڵگریی ئەمریکاوە ڕایگەیاند، ئێران بە خێراییەکی چاوەڕواننەکراو خەریکی سەرلەنوێ بنیاتنانەوەی بنکە و ژێرخانی سەربازیی خۆیەتی و زۆربەی خشتە کاتییەکانی پێشبینییەکانی تێپەڕاندووە. 
پێدراوە هەواڵگرییەکانی ئەمریکا ئاماژە بەوە دەکەن کە تاران لە کاتی ڕاگرتنی شەڕ و ئاگربەستدا، دەستی بەرهەمهێنانەوەی فڕۆکەی بێفڕۆکەوان (درۆن) کردووەتەوە. ئەمەش نیشانەی ئەوەیە کە پرۆسەی سەرلەنوێ ڕێکخستنەوەی کەرتی پیشەسازیی سەربازیی وێرانکراوی ئەو وڵاتە، زۆر خێراترە لەو خەمڵاندنانەی کە سەرەتا بۆی کرابوون. 
به‌پێی  "سی ئێن ئێن" ئێران لە ئێستادا سەرگەرمی قەرەبووکردنەوە و چاککردنەوەی ئەو توانستە سەربازییانەیە کە لە کاتی شەڕدا لەدەستی دابوون، لەوانەش گۆڕین و نوێکردنەوەی پێگەکانی مووشەک، سەکۆکانی هاوێشتن و هێڵەکانی بەرهەمهێنانی سیستمی چەکە سەرەکییەکان. بەپێی هەندێک لە هەڵسەنگاندنە هەواڵگرییەکانی واشنتن، پێدەچێت تاران تەنیا لە ماوەی شەش مانگدا بتوانێت توانای تەواوەتی خۆی بۆ ئەنجامدانی هێرشی درۆنی بەدەست بهێنێتەوە. 
ئەم پێشهاتانە دەریانخستووە کە ئێران سەرجەم ئەو خشتە کاتییانەی تێپەڕاندووە کە لەلایەن دەزگا هەواڵگرییەکانەوە بۆ بنیاتنانەوەی هێزەکانی داڕێژرابوون.