ڕۆژنامەیەكی ئیسرائیلى: ئێران لەسەدا 20ى درۆنە هێرشبەرەكانی ئەمریكای لەناوبردووە

پەیام 

ڕۆژنامەی "یەدیعۆت ئەحرۆنۆت"ی زایۆنی ڕاپۆرتێكی سەبارەت بە زیانە گەورەكانی سوپای ئەمریكا لە ئەنجامی گرژییە سەربازییەكانی ئەم دواییەی لەگەڵ ئێران بڵاوكردەوە. 

بەپێی ڕاپۆرتەكە، هێرشەكان بوونەتە هۆی لەناوبردنی نزیكەی لەسەدا 20ی توانای درۆنە هێرشبەرەكانی سوپای ئەمریكا، ئەمەش وەك گورزێكی كەم وێنە لە هێزەكانی واشنتۆن لە ناوچەكەدا دەبینرێت.

هاوكات وەزارەتی بەرگری ئەمریكا 24 فڕۆكەی بێفڕۆكەوانی پێشكەوتووی لە جۆری "MQ-9 " لەدەستداوە، كە بە یەكێك لە گرانبەهاترین و نوێترین تەكنەلۆژیاكانی جەنگ دادەنرێت. 

سەرچاوەكان ئاماژە بەوە دەكەن، بەهای ئەم زیانانە بە زیاتر لە یەك ملیار دۆلار دەخەمڵێنرێت، بەشێك لەم فڕۆكانە لە كاتی ئەركە سەربازییەكاندا تێكشكێنراون و بەشێكی دیكەشیان لە ناو بنكە و فڕۆكەخانەكاندا لەلایەن موشەكەكانی ئێرانەوە كراونەتە ئامانج.

سەرەڕای بێدەنگی ئیدارەی ئەمریكا لەسەر قەبارەی ڕاستەقینەی زیانەكان، ڕۆژنامەكە لە زاری سەرچاوەیەكی باڵای ئەمریكییەوە ئاشكرای كردووە، واشنتۆن هەوڵەكانی بۆ قەرەبووكردنەوەی ئەم فڕۆكانە لە ڕێگەی گرێبەستی نوێ لەگەڵ كۆمپانیاكانی بەرهەمهێنان دەستپێكردووە. 

ئەم هەوڵانەش لە كاتێكدایە، تاكو ئێستا حكومەتی ئەمریكا بە فەرمی وردەكاریی زیانە سەربازییەكانی نێو جەنگەكەی لەگەڵ ئێران بۆ میدیاكان ئاشكرا نەكردووە.