1 کاتژمێر پێش ئێستا
125 جار خوێنراوەتەوە
واشنتۆن تایمز: ئێران و ئەمریكا لە ڕێككەوتن نزیكن و بەمزووانە ڕادەگەیەنرێت
پەیام
بە پێی سەرچاوەكانی هەواڵی ئەمریكی هەر دوو وڵاتی ئێران و ئەمریكا لە ڕێككەوتن بۆ ڕاگرتنی جەنگ نزیك بوونەتەوە و سەرانی ژمارەیەك وڵاتیش هانی ترەمپیان داوە ڕێككەوتنەكە پەسەند بكات.
تۆڕی هەواڵی سی ئێن ئێن لە سەرچاوەیەكی ئاگادارەوە بڵاوی كردەوە: حاڵەتی چەقبەستوویی لە دانوستانەكانی نێوان ئێران و ئەمریكا كۆتایی هات. ئاژانسی فڕانس پرێس لە بەرپرسانی ئەمریكای گواستەوە كە "ئەمریكا و ئێران لە گەیشتن بە ڕێككەوتن لەسەر یاداشتی لێكتێگەیشتنی كۆتاییهێنان بە جەنگ لێك نزیكن".
فڕانس پرێس لە بەرپرسانی ئەمریكاوە گواستییەوە كە "هیوادارین لە ماوەی 48 كاتژمێری داهاتوودا بڕیار لەسەر یاداشتی لێكتێگەیشتنەكە بدرێت".
ماڵپەڕی ئەكسیۆس لە سەرچاوەیەكی ئەمریكی ئاگادارەوە ڕایگەیاند، كە لە گەیشتن بە ڕێككەوتن بۆ كۆتاییهێنانی جەنگ لەگەڵ ئێران نزیكین.
ئەكسیۆس ئەوەشی ئاشكرایكرد، كە سەرۆكی ئەمریكا پەیوەندی بە سەرانی وڵاتانی قەتەر، سعودییە، ئیماڕات، توركیا و پاكستانەوە كرد و ژمارەیەك لە سەركردەی ئەو وڵاتانە هانی ترەمپیان داوە پێشنیازی ڕێككەوتنەكە پەسەند بكات.
هەر ئەكسیۆسیش ڕایگەیاند، كە هێشتا ترەمپ هیچ بڕیارێكی كۆتایی لەبارەی پێشنیازەكەی ئێران نەداوەتەوە.
ڕۆژنامەی "واشنتن تایمز"یش نووسی: محەمەد باقر قالیباف، سەرۆكی پەرلەمانی ئێران و جی دی فانس، جێگری سەرۆكی ئەمریكا لەگەڵ ستیڤ ویتكوف و جارید كۆشنەر دانوستانكارانی ئەمریكی، ڕەشنووسی ڕێككەوتنەكەیان لا پەسەندە.
واشنتۆن تایمز ڕایشیگەیاند: ئەمریكا و ئێران لە 24 كاتژمێری داهاتوودا ڕێككەوتنی ئاشتی ڕادەگەیەنن.
بەرپرسێكی باكستانیش بە ئاژانسی "ڕۆیتەرز"ی ڕاگەیاندووە: ئەم ڕێككەوتنە كاتییە بۆ كۆتاییهێنان بە جەنگ، هەردوولا دەگەڕێنێتەوە بۆ ئەو خاڵەی كە لە كاتی گفتوگۆكانی ئیسلامئاباد لێی نزیك بووبوونەوە.
بەرپرسەكەی پاكستان ڕایشیگەیاندووە: ناتوانین بڵێین هەموو شتێك تەواوە تا ڕێككەوتنەكە بەدی نەیەت.
لە تۆڕە کۆمەڵایەتیەکان شەیری بکە