پزیشكیان داوای فراوانكردنی بازنەی بڕیاردان و بەشداریپێكردنی لایەنە جیاوازەكان دەكات

پەیام

سەرۆككۆماری ئێران ڕایدەگەیەنێت: پێویستە بەڕێوەبردنی كاروباری دەوڵەت تەنها لە بازنەیەكی بەرتەسكی بڕیاردەراندا قەتیس نەكرێت، سەرۆكی پەرلەمانیش دەڵێت: دوژمن هەوڵ دەدات لەڕێی فشاری ئابووری و جەنگی ڕاگەیاندنەوە دووبەرەكی بنێتەوە.

مەسعوود پزیشكیان سەرۆككۆماری ئێران ڕایگەیاند: وڵاتەكەیان بە قۆناغێكی یەكجار هەستیار و پڕ لە ئاستەنگی جۆراوجۆردا تێدەپەڕێت و ڕووبەڕووی بارودۆخێكی ئاڵۆز بووەتەوە، ئەمەش وا دەخوازێت هەموو تواناكان بۆ تێپەڕاندنی ئەم قۆناغە سەختە بەكاربهێنرێن و سوود لە پسپۆڕی جیاواز وەربگیرێت.

هەروەها جەختی كردەوە، پێویستە بەڕێوەبردنی كاروباری دەوڵەت تەنها لە بازنەیەكی بەرتەسكی بڕیاردەراندا قەتیس نەكرێت، بۆ تێپەڕاندنی قەیرانەكانیش دەبێت پەرە بە بازنەی بەشداریپێكردنی لایەنە جیاوازەكان بدرێت.

پزیشكیان ڕایشیگەیاند: بۆ چارەسەری ئاستەنگەكانی ئێستا تەنها زانیاری بەس نییە، وتیشی: حكومەت هەوڵ دەدات لە ڕێگەی پسپۆڕانەوە، ڕێگەیەك بۆ بەرەنگاربوونەوەی ئەو ئاستەنگە سیاسی و ئابوورییانە بدۆزێتەوە كە دووچاری وڵاتەكەی بوونەتەوە.

لەلایەكی دیكەوە محەمەد باقر قالیباف سەرۆكی پەرلەمانی ئێران ڕایگەیاند: دوژمن هەوڵ دەدات لەڕێی فشاری ئابووری و جەنگی ڕاگەیاندنەوە دووبەرەكی بنێتەوە و یەكڕیزی نیشتمانی تێك بدات، وتیشی: دانوستانكارانی ئێرانی متمانەیان بە وتە و بەڵێنەكانی دووژمن نییە، پێوەرەكانمان ئەنجامی بەرجەستە بووە و بەهیچ ڕێككەوتنێك ڕازی نابین، ئەگەر مافەكانی هاووڵاتیانمان گرەنتی نەكات.