ئیسرائیل هێرشى بەرفراوانى کردە بۆسەر بەیرووت و لێشاوی ئاوارەبوون دەستى پێ کرد

پەیام
بنیامین نەتانیاهۆ و یسرائیل کاتس لە ڕاگەیەنراوێکى هاوبەشدا رایانگەیاند، فەرمانیان بە سوپای ئیسرائیل کردووە هێرش بکاتە سەر ناوچەى باشووری بەیرووت، ئەمەش وەک وەڵامێک بۆ کوژرانی سەربازێکیان لە باشووری لوبنان و بەردەوامیی هێرشەکانى حزبوڵڵا. 
سەرۆک وەزیرانی ئیسرائیل و وەزیری بەرگریی ڕایانگەیاند، کە ڕێنمایی ڕوونیان داوە بە سوپا بۆ بۆردومانکردنی چەند ئامانجێک لە باشووری بەیرووت. ئەم بڕیارە چەند کاتژمێرێک دوای ئەوە هات کە سوپای ئیسرائیل دانی بە کوژرانی سەربازێک و برینداربوونی چەند سەربازێکی دیکەدا نا لە کاتی ڕووبەڕووبوونەوەکانی باشووری لوبناندا. 
نەتانیاهۆ و کاتس ئاماژەیان بەوە کردووە کە ئەم هەنگاوە وەڵامێکە بۆ کوژرانی سەربازێکیان و برینداربوونی چەندانی دیکە لە هێرشە درۆنییەکانى حزبوڵڵا. 
لەلایەکی دیکەوە، ماڵپەڕی "ئەکسیۆس" لە زاری بەرپرسانی ئیسرائیلییەوە بڵاویکردەوە، کە تەلئەبیب داوای گڵۆپی سەوزی لە ئیدارەی دۆناڵد ترەمپ کردووە بۆ ئەنجامدانی هێرشی بەرفراوان لە بەیرووت. ئەمەش لە کاتێکدایە کە سەرچاوە ئەمریکییەکان ئاماژە بە سستبوونی هەوڵەکانی ئەم دواییەی ئاگربەست دەکەن و هۆشداری دەدەن لەوەی ڕەنگە واشنتۆن دەستکراوەیی زیاتر بداتە ئیسرائیل بۆ فراوانکردنی گرژییەکان.