ئێران، ئەمریکا و ئیسرائیل بە پێشێلکردنی ئاگربەست تۆمەتبار دەکات

ئێران، ئەمریکا و ئیسرائیل بە پێشێلکردنی ئاگربەست تۆمەتبار دەکات و هۆشداری دەدات کە بۆ پاراستنی بەرژەوەندییەکانی پەنا بۆ هەنگاوی کردەیی و وەڵامدانەوە دەبات. 
ئیسماعیل بەقایی، وتەبێژی وەزارەتی دەرەوەی ئێران، ڕایگەیاند ئەمریکا و ئیسرائیل بەردەوامن لە پێشێلکردنی ڕێککەوتنی ئاگربەست لە ناوچەکەدا و جەختی کردەوە تاران بە وردی چاودێری پەرەسەندنەکان دەکات و بۆ پاراستنی سەروەریی خاکی خۆیشی، پەنا بۆ هەموو ڕێکارێکی پێویست دەبات. 
بەقایی ئەو ئاماژەی پێ کرد کە هێرشە ئەمدواییانەی سوپای ئەمریکا بۆ سەر پێگە ئێرانییەکان و زیادبوونی هێرشەکانی ئیسرائیل بۆ سەر لوبنان، بەڵگەی ڕوونی ئەوەن کە واشنتۆن و تەلئەبیب نایانەوێت ئاشتی جێگیر بێت. 
وتەبێژەکەی ئێران هۆشداری دا کە ناوەندەکانی بڕیاردان سەرقاڵی دیاریکردنی جۆری وەڵامدانەوەن و ئەگەر دەستدرێژییەکان بەردەوام بن، هەنگاوی کردەیی دەگرنە بەر. 
ئەم لێدوانانە دوای ئەوە هات سوپای ئەمریکا ڕایگەیاند چەندین سیستەمی بەرگری و ڕاداری ئێرانیی لە ناوچەکانی گۆرۆک و دوورگەی قەشم تێکشکاندووە و نەتەنیاهوویش فەرمانی بۆردومانکردنی چڕی زاحیەی جنوبی بەیروتی دەرکردووە، کە بە وتەی بقائی، ئەمریکا بەرپرسیارێتی تەواوی ئەم خوێنڕشتنانەی لە ئەستۆدایە.