ئیسرائیل نەیهێشت گەنجێك بە ئاهەنگی هاوسەرگیرییەكەی شاد بێت

پەیام

لە دیمەنێكدا كە بە دەیانی هاوشێوەی لە ماوەی جەنگ تێیدا دووبارە بووەتەوە، گەنجێك لە كەرتی غەززە كە بەنیاز بوو ئەم ئێوارەیە بچێتە پڕۆسەی هاوسەرگیرییەوە، بەرەبەیانی ئەمڕۆ لەنێو چادرەكەیدا بە هێرشێكی ئاسمانیی سوپای زایۆنی سووتا و گیانی لەدەست دا.

لە شاری خان یونس لە باشووری كەرتی غەززەی فەڵەستین، (موهەننەد فروانە)ی 25 ساڵ، خەریكی دوایین ئامادەكاری بوو بۆ ئاهەنگی هاوسەرگیرییەكەی كە بڕیار بوو ئێوارەی ئەمڕۆ شەممە بەڕێوە بچێت. 

تەنیا چەند كاتژمێرێكی مابوو بۆ دەستپێكردنی ژیانێكی نوێ، بەڵام هێزی ئاسمانیی زایۆنی بێدەنگیی شەویان بە ئاگر و خوێن شكاند، موهەننەد لەنێو ئەو چادرەی لە سەربانی ماڵەكەیان هەڵی دابوو، بەهۆی بۆردومانەكەوە بە زیندویی سووتا و شەهید بوو.

موهەننەد گەنجێكی دەرچووی زانكۆ بوو، هەر ئەو شوێنەی كاتژمێر سێی بەرەبەیان لە لایەن قەوارەی زایۆنییەوە بۆردومان كراوە بۆ پێشوازی لە بووكەخان ئامادەی كردبوو، بەڵام بەهۆی بۆردومانەكەوە كەلوپەل و پێداویستیی خانە بچووكەكەی موهەننەد لەگەڵ خوێنی خۆی تێكەڵ كرا و ئەو گوڵەی بۆ پێشوازیی لە بووك كۆی كردبووەوە بۆ مەڕاسیمی دواین ماڵاوایی بەكار هێنرا.

كەسوكاری موهەننەد فراوانە بانگەوازی كۆمەڵگەی نێودەوڵەتی دەكەن هەر چی زووە بۆ ڕاگرتنی كۆمەڵكوژی هاووڵاتیانی فەڵەستینی لە كەرتی غەززە دەستوەردان بكەن.