حوسییەکان هاتنە نێو پێکدادانەکانەوە و هێرشیان ئەنجام دا

وتەبێژی سەربازیی گرووپی ئەنسارولڵا (حوسییەکان) ڕایگەیاند، کە چەندین مووشەکیان ئاڕاستەی ناوچەی یافا کردووە و لەمەودواش گەمارۆیەکی گشتگیری دەریایی بەسەر سەرجەم کەشتییەکانی ئیسرائیلدا لە دەریای سوور دەسەپێنن. 
یەحیا سەریع، وتەبێژی سەربازیی حوسییەکان، لە ڕاگەیەندراوێکدا ئاماژەی پێ کرد کە هێزەکانیان "ئامانجە هەستیارەکانی" ناوچەی یافایان پێکاوە. ناوبراو جەختی کردەوە جوڵەی دەریایی ئیسرائیل لە دەریای سوور بە تەواوی قەدەغە دەکەن و هەر جۆرە هاتوچۆیەکی کەشتییەکانی ئەو قەوارەیە دەبێتە ئامانجی ڕاستەوخۆی هێزەکانیان. 
لە بەشێکی دیکەی وتەکانیدا، وتەبێژەکەی حوسییەکان هۆشداریی دا کە لە بەرانبەر پەرەسەندنە سەربازییەکاندا پەنا بۆ "زیادکردنی هێرشەکان" دەبەن. ڕاشیگەیاند کە هێرشەکانیان لەگەڵ پێشهاتەکاندا پەرە دەستێنێت و ئەو هەنگاوانەش بە هەماهەنگی و بەشداریی "بەرەی موقاوەمە" ئەنجام دەدرێن. 
ئەم پەرەسەندنە نوێیە لە کاتێکدایە کە گرژییەکانی ناوچەکە و ئاڵۆزییەکانی سەر ڕێڕەوە ئاوییەکان ڕوو لە زیادبوونە. حوسییەکان دەڵێن ئامانجیان لەم بڕیارانە گوشارخستنە سەر ئیسرائیلە.