ئێران: ئامادەین بۆ شەڕێکی درێژخایەن

سەرچاوەیەکی سەربازیی ئێران ڕایگەیاند وڵاتەکەی ئامادەیە بۆ شەڕێکی درێژخایەن، هاوکات سەرۆکی ئەمریکاش داواى کرد بە زووترین کات کۆتایی بە شەڕ بهێنرێت. 
ئاژانسی "تەسنیم" لە زاری سەرچاوەیەکی سەربازیی ئێرانییەوە بڵاوی کردەوە کە تاران پێى وایە واشنتۆن  بەرپرسیارە لە سەرجەم هێرشەکانی ئیسرائیل و تەواوی ڕێوشوێنە پێویستەکانیشی بۆ لێدانی بەرژەوەندییەکانی ئەمریکا گرتووەتە بەر. سەرچاوەکە ئاماژەی بەوەش کردووە کە ئێران هەمیشە پشتیوانی لە هاوپەیمانەکانی لە بەرەی موقاوەمە کردووە و لە ڕۆژانی داهاتوودا ئاستی هێرشەکانى بۆ سەر ئیسرائیل بە جۆرێک زیاد دەکات کە پەشیمان ببنەوە لە بەردەوامبوونی کردەوەکانیان. 
لەلایەکی دیکەوە، سەرپەرشتیاری وەزارەتی بەرگریی ئێران جەختی لەسەر بەردەوامیی پاڵپشتیکردنی هێزە چەکدارەکانی وڵاتەکەی کردەوە بە بەکارهێنانی تەواوی تواناکانی بەرگری و لۆجستی، و ڕایگەیاند تاران لە پاراستنی ئاسایش و بەرژەوەندییەکانی پاشەکشە ناکات تا ئەو کاتەی لایەنی هێرشبەر سزا دەدرێت، هۆشداریشی دا کە ئیسرائیل لە ئێستادا لە هەر کاتێکی دیکە زیاتر لە داڕمان نزیک بووەتەوە. 
هاوتەریب لەگەڵ ئەم لێدوانانە، دۆناڵد ترەمپ، سەرۆکی ئەمریکا لە ڕێگەی پلاتفۆرمی "تروس سۆشیاڵ" ـەوە پەیامێکی بڵاوکردەوە و تێیدا داوای لە ئێران و ئیسرائیل کرد کە بە زووترین کات و بە شێوەیەکی دەستبەجێ کۆتایی بە شەڕ و پێکدادانەکانی نێوانیان بهێنن.