ئێران: له‌گه‌ڵ ئه‌مریكادا له‌ ئاشتیدا نین و لایه‌نێكی بڕواپێنه‌كراوه‌

په‌یام
سەرۆکی پەرلەمانی ئێران ڕایگەیاند وڵاتەکەی هیچ ئاشتییەکی لەگەڵ ئەمریکادا نییە و دان بە ئیسرائیلدا نانێت، ئاماژەی بەوەش کرد کە تاران هەمیشە پشتگیریی "بەرەی موقاوه‌مه‌" دەکات. 
بەپێی ڕاپۆرتی تەلەفزیۆنی فەرمیی ئێران، محەمەد باقر قاڵیباف، سەرۆکی پەرلەمانی ئێران، لە میانی دیدارێکیدا لە تاران لەگەڵ محەمەد دەروێش، سەرۆکی ئەنجومەنی سەرکردایەتیی بزووتنەوەی حەماس، ئەمریکای بە لایەنێکی باوەڕپێنەکراو ناوبرد. قاڵیباف جەختی لەوە کردەوە کە وڵاتەکەی لەگەڵ واشنتن لە دۆخی ئاشتیدا نییە و بە هیچ شێوەیەکیش بە فەرمی دان بە ئیسرائیلدا نانێت. 
سەرۆکی پەرلەمانی ئێران لەم کۆبوونەوەیەدا ڕایگەیاند تاران لە کاتی پێویستدا هاوکاریی موشەکی و لە کاتی گونجاویشدا پشتگیریی سیاسی پێشکەشی موسڵمانان و "بەرەی موقاوه‌مه‌" دەکات. ناوبراو ئاماژەی بەوە دا کە ئەم جۆرە هاوکارییانە وەک بەشێک لە ستراتیژیی وڵاتەکەی بۆ پشتیوانیکردن لە هاوپەیمانەکانی لە ناوچەکەدا بەردەوام دەبن. 
سەبارەت بە پرسی گفتوگۆکان لەگەڵ ویلایەتە یەکگرتووەکانی ئەمریکا، قاڵیباف ڕوونی کردەوە کە ئێران هێڵە سوورەکانی خۆی لە دانوستانەکاندا بە ڕوونی دیاری کردووە و پارێزگاریی لێ کردوون، کە تێیدا "بەرەی موقاوه‌مه‌" و لوبنان وەک هێڵی سووری سەرەکی ئەژمار دەکرێن. هاوکات بەڵێنی دا کە تاران بە تەواوی جددییەتەوە بەدواداچوون بۆ دۆسیەی قۆناغی دووەمی ئاشتی و ئاگربەست لە کەرتی غەززەدا دەکات.