5 رۆژ پێش ئێستا
249 جار خوێنراوەتەوە
ڕووسیا هێرشێکى دیکەى بەرفراوانى کردە سەر ناوچەکانى ئۆکرانیا
پەیام
لە ئەنجامی هێرشێکی بەرفراوانی مووشەکی و درۆنیی ڕووسیا بۆ سەر کیێڤی پایتەخت و ناوچەکانی دیکەی ئۆکرانیا، لانی کەم ١٠ کەس کوژران، دەیان کەس برینداربوون و زیانێکی زۆر بەر ژێرخانی وڵاتەکە گەیشت.
وەزارەتی بەرگریی ڕووسیا لە بەیاننامەیەکدا لە تۆڕی تێلیگرام ڕایگەیاند، هێزەکانیان بە چەکی پێشکەوتوو و دوورمەودا لە ڕێگەی ئاسمان، وشکانی و دەریاییەوە هێرشێکی بەرفراوانیان کردووەتە سەر کیێڤ و چەند ناوچەیەکی دیکە. ئامانجی هێرشەکانیش پێگەی سەربازی و دامەزراوەکانی وزە بووە لە پایتەخت و دەوروبەری، لەگەڵ چەندین فڕۆکەخانەی سەربازی لە ناوچە جیاوازەکانی ئۆکرانیا.
لە بەرانبەردا، لێپرسراوانی ئۆکرانیا ئاماری قوربانییەکانیان بڵاوکردەوە. تەیمور تکاچێنکۆ، سەرۆکی ئیدارەی سەربازیی کیێڤ ڕایگەیاند تەنیا لە سەنتەری پایتەخت ٩ کەس کوژراون و ٤٦ کەسی دیکەش برینداربوون. هاوکات لە شارۆچکەی بوچا لە دەوروبەری کیێڤ، کەسێکی دیکە گیانی لەدەستداوە، کە بەو هۆیەوە میکۆلا کالاتشنیک، بەرپرسی ئیدارەی سەربازیی ناوچەکە، مۆسکۆی تۆمەتبار کرد بەوەی کە بە ئەنقەست خەڵکی مەدەنی و ژێرخانی شارستانیی کردووەتە ئامانج.
بەپێی زانیارییەکانی دەزگای فریاگوزاریی ئۆکرانیا، لانی کەم ١٥ باڵەخانەی نیشتەجێبوون لە کیێڤ زیانیان بەرکەوتووە یان خاپوور بوون، لە نێویاندا باڵەخانەیەکی نۆ نهۆمی لە ناوچەی پۆدێلسکی و کۆگایەک لە ناوچەی ئۆبۆلۆنسکی، کە تا ئێستاش تیمەکانی فریاگوزاری سەرقاڵی گەڕانن بەدوای قوربانییاندا. ئەم شەپۆلە نوێیە لە کاتێکدایە کە هەفتەی ڕابردوو لە سەختترین هێرشی ڕووسیادا بۆ سەر پایتەخت لە سەرەتای جەنگەکەوە، ٣٠ کەس کوژران و نزیکەی ١٠٠ کەسی دیکەش برینداربوون.
لە تۆڕە کۆمەڵایەتیەکان شەیری بکە