نیویۆرک تایمز: پێدەچێت تڕەمپ ڕازی بێت بە گەڕانەوەی تورکیا بۆ بەرنامەی فڕۆکەی ئێف ‎٣٥‎

ڕۆژنامەی نیویۆرک تایمز بڵاویکردەوە، چاوەڕوان دەکرێت دۆناڵد ترەمپ لە لوتکەی ناتۆ لە ئەنقەرە بە ڕەجەب تەیب ئەردۆغان ڕابگەیەنێت کە ئامادەیە ڕێگە بە تورکیا بدات بگەڕێتەوە بەرنامەی فڕۆکەی جەنگیی ئێف-‎٣٥‎. 
بەپێی زانیارییەکانی چوار بەرپرسی باڵای ئەمریکا کە قسەیان بۆ ڕۆژنامەکە کردووە، ئەم پێشهاتە هاوکاتە لەگەڵ سەردانەکەی ترەمپ بۆ ئەنقەرە بەمەبەستی بەشداریکردن لە لوتکەی ناتۆ کە بڕیارە ئێوارەی سێشەممە دەست پێبکات. هەرچەندە بەرپرسان لەسەر وردەکاریی ئەو میکانیزمە ناکۆکن کە ترەمپ بۆ تێپەڕاندنی کۆتوبەندە یاساییەکانی کۆنگرێس دەیگرێتەبەر، بەڵام ئاماژە بە ئەگەری ئاڵوگۆڕی نامە لەنێوان هەردوو سەرۆکدا دەکەن بۆ چارەسەرکردنی ئەم پرسە. 
کڕینی سیستەمی بەرگریی ئاسمانیی ئێس-‎٤٠٠‎ی ڕووسی لەلایەن تورکیاوە لە ساڵی ‎٢٠١٩‎، بووە هۆی گرژبوونی پەیوەندییەکانی نێوان واشنتن و ئەنقەرە. لە کاردانەوەی ئەم هەنگاوەدا، ئەمریکا سزای بەسەر تورکیادا سەپاند و لە بەرنامەی ئێف-‎٣٥‎ دووریخستەوە. 
هەروەها کۆنگرێس یاسایەکی پەسەندکرد کە فرۆشتنی ئەو جۆرە فڕۆکە پێشکەوتووانە بە ئەنقەرە قەدەغە دەکات تا ئەو کاتەی سیستەمە ڕووسییەکە لەخۆدەگرێت، چونکە بە مەترسییەکی ئەمنیی بۆ سەر فڕۆکەکانی ئەمریکا دادەنرێت. 
سەرەڕای ئەوەی ئەم پرسە لە ڕابردوودا خاڵێکی سەرەکیی ناکۆکییەکانی نێوان هەردوو وڵات بووە، بەڵام ئەم هەنگاوە نوێیە ئاماژەیە بۆ باشتربوونی پەیوەندییەکان لە سەردەمی ئیدارەی ترەمپ.