پێش 4 هەفتە
178 جار خوێنراوەتەوە
یەكێتیی ئەورووپا: دیزاینی فەیسبووك و ئینستاگرام هۆکارە بۆ "ئالوودەبوون"ی بەكارهێنەران
پەیام
یەكێتیی ئەورووپا زەنگی مەترسی بۆ كۆمپانیای (مێتا) لێ دەدات و ئاشكرای دەكات كە دیزاینی فەیسبووك و ئینستاگرام دەبێتە هۆی "ئالوودەبوون"ی بەكارهێنەران، بۆیە ئەگەر گۆڕانكاری نەكات ڕووبەڕووی سزایەكی دارایی زەبەلاح دەبێتەوە كە دەگاتە ملیاران دۆلار.
بەپێی هەڵسەنگاندنێكی سەرەتایی، كۆمیسیۆنی ئەورووپا ڕایگەیاندووە: (مێتا) پێشێلی یاسای خزمەتگوزارییە دیجیتاڵییەكانی كردووە، بەتایبەتی لە بەكارهێنانی تایبەتمەندییەكانی وەك: خلیسكاندنی بێكۆتا (سكرۆڵینگ)، هەروەها لێدانی خۆكارانە (ئۆتۆماتیكی)ی ڤیدیۆكان و ئاگاداركردنەوە خێراكان لە فەیسبووك و ئینستاگرام كە بەكارهێنەر ناچار دەكەن بەبێ ویستی خۆی كاتێكی زۆر لەسەر شاشەكان بەسەر ببات.
هێنا ڤیركۆنێن، جێگری سەرۆكی كۆمیسیۆنی ئەورووپا، پاراستنی تەندروستیی جەستەیی و دەروونیی بەكارهێنەرانی بە كاری لەپێشینە ناو برد. ڕایشیگەیاند: یاساكان چوارچێوەیەكی ڕوونی هەیە بۆ لێپرسینەوە لەو كۆمپانیایانەی دیزاینی ئالوودەكەر بەكار دەهێنن.
لە بەرانبەردا، لێكۆڵینەوەكان دەریانخستووە كە (مێتا) بە ئەنقەست گوێی بەو داتایانە نەداوە كە نیشانی دەدەن مێردمنداڵان لە شەواندا كاتێكی زۆر لەسەر فەیسبووك و ئینستاگرام بەسەر دەبەن، بەتایبەتی بەهۆی تایبەتمەندییەكانی وەك "ڕێڵز" و "ستۆری".
لە كۆتاییدا، ئەگەر ئەم پێشێلكارییانە بە فەڕمیی پشتڕاست بكرێنەوە كۆمپانیای (مێتا) ناچار دەكرێت گۆڕانكاریی ڕیشەیی لە پلاتفۆرمەكانیدا بكات، ئەگەرنا سزایەكی قورس دەدرێت كە دەگاتە لەسەدا 6ـی كۆی داهاتی ساڵانەی كۆمپانیاكە لە جیهاندا كە پێشبینی دەكرێت زیاتر لە 12 ملیار دۆلار بێت.
لە تۆڕە کۆمەڵایەتیەکان شەیری بکە