پێش 4 هەفتە
244 جار خوێنراوەتەوە
بەهۆى نزاکردنى بۆ شەهیدان، ئیسرائیل موفتی قودسی دوورخستەوە
پەیام
دوای دەستگیركردنی لە ئەقسا بەهۆی نزا بۆ شەهیدان، قەوارەی زایۆنی بۆ جاری چەندهەمین موفتی قودسی دوور خستەوە.
دەسەڵاتدارانی قەوارەی زایۆنی، شێخ محەمەد حسێن، موفتی گشتی قودسیان دوای وتاری هەینی كە 70 هەزار كەسی تێیدا ئامادە بوو، دەستگیر كرد و پاش چەند كاتژمێرێك بە مەرجی دوورخستنەوەی لە مزگەوتی ئەقسا ئازادیان كرد.
هۆكاری دەستگیركردنەكەی موفتی گشتیی قودس بۆ نزاكردنی بۆ "شەهیدان" لە وتارەكەیدا دەگەڕێتەوە كە وتوێتی "خوایە لەگەڵ پێغەمبەران و شەهیدان و ڕاستگۆیان حەشرمان بكەیت".
شێخ محەمەد حسێن 76 ساڵ، كە لە ساڵی 2006ـەوە موفتی گشتی قودس و فەڵەستینە، تا ئێستا چەند جارێك دەستگیر كراوە و كۆتا جاریش ساڵی ڕابردوو بۆ ماوەی شەش مانگ لە مزگەوتی ئەقسا دوور خرایەوە.
بەپێی زانیارییەكان، دەسەڵاتدارانی قەوارەی زایۆنی هەر كەسێك وشەی (شەهیدان) بەكار بهێنێت دەستگیری دەكات، جا لە وتاری ئایینیدا بێت، یان لە تۆڕە كۆمەڵایەتییەكان، بەو هۆیەوە لە چەند مانگی ڕابردووەوە تا ئێستا سەدان كەسی فەڵەستینی دەستگیر كردووە.
هەر لەو میانەیەدا نزیكەی 100 ژنە فەڵەستینی بەهۆی كارلێكیان لە تۆڕە كۆمەڵایەتییەكان دەستگیر كراون، یان ڕاوەدونراون.
لە تۆڕە کۆمەڵایەتیەکان شەیری بکە