ئه‌كسیۆس: ڕێكه‌وتنی ئه‌مریكا و ئێران نزیكه‌

په‌یام

ئەمریکا و ئێران بە ناوبژیوانیی عومان لە واژووكردنی ڕێککەوتنێکی کاتی بۆ کردنەوەی گەرووی هورمز و پیاده‌كردنی ئاگربەست و دەستپێکردنەوەی دانوستانە ئەتۆمییەکان نزیک دەبنەوە.

بەپێی ڕاپۆرتێکی ماڵپەڕی "ئەکسیۆس" بە پشتبەستن بە سەرچاوەکانی، ڕێککەوتنە پێشنیارکراوەکە بۆ ماوەی ٦٠ ڕۆژ دەبێت و ئەگەری درێژکردنەوەی هەیە. لە چوارچێوەی ئەم ڕێککەوتنەدا، ئاراستەی هاتووچۆی كه‌شتیوانی لە گەرووی هورمز ڕێکدەخرێتەوە؛ بە شێوەیەک کەشتییە هاتووه‌کان بەرەو کەنداو ڕێڕەوی باکوور لەناو ئاوە هەرێمییەکانی ئێران بەکاربهێنن و کەشتییە دەرچووەکانیش بە ڕێڕەوی باشوور لە ئاوەکانی عوماندا تێپەڕبن. هەروەها بڕیارە هیچ باج و رسووماتێک نەسەپێندرێت و لە ماوەی ٣٠ ڕۆژدا مینە دەریاییەکان پووچەڵ بکرێنەوە.

ئەم هەنگاوە دوای دوو هەفتە لە شەڕ و ئاڵۆزیی سەربازی له‌نێوان ئێران و واشنتن هات کە خەریک بوو ناوچەکە بەرەو جەنگێکی گشتگیر ببات.

لە تەنیشت عومان، وڵاتانی قەتەر، سعودیە و پاکستان بەشدارییان لە هه‌وڵی نێوه‌ندگیری له‌نێوان ئه‌مریكا و ئێراندا کردووە، بە شێوەیەک کە لە ڕۆژانی ڕابردوودا ستێڤ ویتکۆف، نێردراوی تایبەتی سەرۆکی ئەمریکا پەیوەندیی ڕاستەوخۆی لەگەڵ عەباس عه‌راقچی، وەزیری دەرەوەی ئێران و بەدر ئەلبوسەیدی، وەزیری دەرەوەی عومان ئەنجامداوە. سەرەڕای کۆتاییهاتنی ڕێکارەکانی ڕەزامەندیی سەرکردایەتیی ئێران لەسەر ڕەشنووسەکە، تا ئێستا هیچ ڕاگەیەندراوێکی فەرمی لەلایەن واشنتن یان تارانەوە دەرنەچووە و دانوستان لەسەر هەندێک وردەکاری بەردەوامە.