دادگای فیدراڵیی لەبارەى پرسی پلەبەرزكردنەوەی فەرمانبەرانی هەرێم كۆدەبێتەوە

پەیام 

بڕیارە ڕۆژی چوارشەممەی داهاتوو دادگای فیدراڵیی عێراق سەبارەت بە پرسی پلەبەرزكردنەوەی فەرمانبەرانی هەرێم كۆببێتەوە، ئەمەش دوای سكاڵایەكی یاسایی دێت كە داوای هەڵوەشاندنەوەی بڕیاری ڕاگرتنی پلەبەرزكردنەوە دەكات.

بەپێی خشتەی دانیشتنەكانی دادگای باڵای فیدراڵیی عێراق، ڕۆژی چوارشەممە ڕێكەوتی 19ی ئاب، دادگاكە تایبەت بە دۆسیەی پلەبەرزكردنەوەی فەرمانبەرانی هەرێمی كوردستان كۆ دەبێتەوە.

ئەم دانیشتنە لەسەر بنەمای سكاڵایەكە كە لەلایەن سێ فەرمانبەر بە ناوەكانی (ئەحمەد محەمەد ساڵح، هادی حەمەڕەشید و سەرتیب ناسیح) لە دژی سەرۆكی ئەنجومەنی وەزیرانی هەرێمی كوردستان تۆمار كراوە.

سكاڵاكاران داوا دەكەن دادگا بڕیاری ژمارە (56)ی ساڵی 2015ی ئەنجومەنی وەزیرانی هەرێم بە نادەستووری بناسێنێت، كە بەهۆیەوە پلەبەرزكردنەوەی فەرمانبەرانی مەدەنی ڕاگیراوە.

هەروەها داواكاری سەرەكی سكاڵاكە بریتییە لە پابەندكردنی حكومەت بە دەستپێكردنەوەی پلەبەرزكردنەوە و خەرجكردنی تەواوی شایستە داراییە كەڵەكەبووەكان بە كاریگەریی ڕابردوو، واتە لەو ڕێكەوتەوەی كە هەر فەرمانبەرێك بەپێی یاسا شایستەی پلەبەرزكردنەوە بووە و بۆی ئەژمار نەكراوە.

ئەم جموجۆڵەی دادگای فیدراڵی لە كاتێكدایە، رۆژى پێنجشەممە 13ى 8ى 2026 وەزارەتی دارایی هەرێمی كوردستان بە فەرمی گشتاندنی بۆ دەستپێكردنەوەی ڕێكارەكانی پلەبەرزكردنەوە كردووە.

بڕیارەكەی دادگا دەتوانێت یەكلاكەرەوە بێت بۆ چەسپاندنی مافە داراییەكانی فەرمانبەران بۆ ئەو ساڵانەی كە پلەبەرزكردنەوەیان تێدا ڕاگیرابوو، كە بارگرانییەكی زۆری دارایی بۆ فەرمانبەران دروست كردبوو.