سعودیە و عێراق هەماهەنگییە سەربازی و ئەمنییەكانی نێوانیان بەهێزتر دەكەن

پەیام

وەزیری بەرگریی سعودیە جەختی لە بەهێزكردنی هەماهەنگی سەربازی و پشتگیریكردنی سەقامگیری عێراق كردەوە.

خالید بن سەلمان، وەزیری بەرگریی سعودیە، لە ڕیاز پێشوازی لە فەریق یەكەم روكن عەبدولئەمیر شەمەری، بەڕێوەبەری نووسینگەی فەرماندەی گشتیی هێزە چەكدارەكانی عێراق كرد و لە كۆبوونەوەیەكیاندا، هەردوولا پەیوەندییە سەربازی و بەرگرییەكانی نێوان هەردوو وڵات و دواین پێشهاتە هەرێمییەكانیان تاوتوێ كرد.
وەزیری بەرگریی سعودیە دووپاتی كردەوە كە وڵاتەكەی هاوشانی عێراق دەوەستێت و پشتگیری لە ئاسایش، سەقامگیری و گەشەپێدانی دەكات. 

ئاماژەی بەوەش كرد كە عێراق "دراوسێیەكی ئازیزە" و جەختی لە قووڵی پەیوەندییە برایانەكانی نێوان هەردوو وڵات كردەوە.

هەروەها بن سەلمان باسی لە گرنگی بەردەوامبوونی هەماهەنگی و گۆڕینەوەی زانیارییەكان كرد بۆ خزمەتكردنی بەرژەوەندییە هاوبەشەكان و پاراستنی ئارامی ناوچەكە. 

ڕاشیگەیاند كە سعودیە لە پاڵپشتییەكانی بۆ عێراق بەردەوام دەبێت تا ئەو كاتەی گەشەپێدان و خۆشگوزەرانی بۆ گەلی عێراق بەتەواوی دەستەبەر دەبێت.