گرووپه‌ چه‌كداره‌كان ڕەخنە لە هەژموونی ئەمریکا له‌ عێراق ده‌گرن

ئەبو ئالا وەلائی ئەمینداری گشتیی کەتائیبی سەیدولشوهەدا داوای ڕزگارکردنی سامانی عێراقی لە هەژموونی ویلایەتە یەکگرتووەکانی ئەمریکا کرد. 
ئەبو ئالا وەلائی ئەمینداری گشتیی کەتائیبی سەیدولشوهەدا لە پەیامێکدا لە پلاتفۆرمی ئێکسی ئەمریکی، هەژموونی ویلایەتە یەکگرتووەکانی ئەمریکای بەسەر دارایی و سامانی عێراقدا بە "کەمیی سەروەری" وەسف کرد. ناوبراو داوای کرد عێراق لە ژێردەستەیی دارایی واشنتن ڕزگار بکرێت و ئاڕاستەی ئابووریی وڵات بەرەو جۆراوجۆرکردنی بازاڕەکانی هەناردەکردن و پەیوەندییە بانکییەکان ببرێت. وەلائی جەختی کردەوە نابێت سامانەکانی وڵات وەک "بەخشین" بن، بەڵکو پێویستە وەک مافێکی ڕەسەنی سەروەری بۆ گەل بگەڕێنرێنەوە تاوەکو ڕێگری لە هەر پەککەوتنێکی دارایی بکرێت. 
ئەمینداری گشتیی کەتائیبی سەیدولشوهەدا ڕایگەیاند سەروەریی تەواو تەنها بە کۆنتڕۆڵی خاک نییە، بەڵکو دەبێت عێراق خاوەنی بڕیاری دارایی سەربەخۆ بێت دوور لە دەستوەردانی هێزە دەرەکییەکان. ناوبراو ئاماژەی بەوە کرد تێپەڕاندنی ئەم ئاڵنگارییە پێویستی بە گۆڕینی ڕێڕەوی بازرگانی و بونیادنانی سیستمێکی بانکیی نوێ هەیە کە پارێزەری سەروەتەکانی نیشتمان بێت. 
پێشتر وەزارەتی دەرەوەی ئەمریکا پاداشتی ١٠ ملیۆن دۆلاری بۆ هەر زانیارییەک لەسەر ئەبو ئالا وەلائی دیاری کردبوو بە تۆمەتی ئەنجامدانی هێرش بۆ سەر بەرژەوەندییەکانی واشنتن لە عێراق و سووریا