1 کاتژمێر پێش ئێستا
103 جار خوێنراوەتەوە
تەقینەوەیەك لەبەردەم كۆشكی دادی حەسەكە دوو قوربانی لێكەوتەوە
پەیام
لە ئەنجامی تەقینەوەی نارۆنجۆكێكی دەستی لەبەردەم كۆشكی داد لە شاری حەسەكەی رۆژئاو ای كوردستان، باوكێك و منداڵێكی گیانیان لەدەست دا. هێزە ئەمنییەكانیش دەستبەجێ دەوری ناوچەكەیان گرت بۆ لێكۆڵینەوە لە ڕووداوەكە و پاراستنی ئاسایشی هاووڵاتیان.
بەپێی تەلەفزیۆنی فەرمی سوریا، تەقینەوەكە كاتژمێر 9:30ی بەیانی ئەمڕۆ هەینی، ڕووی داوە.
سەرچاوەیەكی ئەمنی پشتڕاستی كردەوە كە هۆكاری ڕووداوەكە نارۆنجۆكێكی دەستی بووە كە لەبەردەم باڵەخانەی "كۆشكی داد" تەقیوەتەوە.
خالید ئەلخالید بەڕێوەبەری تەندروستی حەسەكە ڕایگەیاند، بەشی فریاكەوتنی نەخۆشخانە پیاوێكی تەمەن سی ساڵان و منداڵێكی تەمەن 13 ساڵانی وەرگرتووە كە بەهۆی سەختی برینەكانیانەوە دوای گەیشتنیان بە نەخۆشخانە گیانیان لەدەست داوە.
ناوبراو ئاماژەی بەوەش كرد، كە تا ئێستا ناسنامەی هەردوو قوربانیەكە دیار نییە، چونكە هیچ جۆرە بەڵگەنامەیەكی فەرمییان پێ نەبووە لە كاتی ڕووداوەكەدا.
لە ئێستادا هێزە ئەمنییەكانی شاری حەسەكە ناوچەكەیان بە تەواوی گەمارۆداوە و ڕێوشوێنی پێویستیان گرتووەتەبەر بۆ پاراستنی هێمنی و لێكۆڵینەوە لە وردەكارییەكانی تری ئەم كارەساتە.
لە تۆڕە کۆمەڵایەتیەکان شەیری بکە