ترەمپ: لەئێستادا سەرنجمان لەسەر سزای ئابووری و فشارخستنە سەر ئێرانە

پەیام 

دۆناڵد ترەمپ، سەرۆكی ئەمریكا، ڕایگەیاند، لە ئێستادا سەرنجیان لەسەر سزای ئابووری و فشارخستنە سەر ئێران و ئەو وڵاتانەیە كە بازرگانی لەگەڵ تاراندا دەكەن. 

دۆناڵد ترەمپ بە ڕۆژنامەنووسانی وت: "نامانەوێت قسەیان لەگەڵ بكەین و هەوڵی هیچ دیدارێك نادەین"؛ ئەمەش نیشاندەری توندتربوونی سیاسەتی ئەمریكایە بەرامبەر بە تاران.

هاوكات ڕۆژنامەی وۆڵ ستریت جۆرناڵ ئاماژەی بەوە كرد كە ئیدارەی ترەمپ ئارەزووی گەڕانەوە بۆ یاداشتنامەی لێكتێگەیشتنی مانگی حوزەیرانی نییە و تەنها گرەو لەسەر كاریگەریی سیاسەتی فشارە ئابوورییەكان دەكات.

لە بەرامبەردا، عەباس عەراقچی، وەزیری دەرەوەی ئێران، ئەمریكای بەوە تۆمەتبار كرد كە ڕێگری لە جێبەجێكردنی ڕێككەوتنی كۆتاییهێنان بە جەنگ دەكات. 

عەراقچی ئاماژەی بەوە كرد واشنتۆن پابەندییەكانی لەبارەی ئاگربەستەوە پێشێل كردووە و لە ڕێگەی سەپاندنی سزای ئابووریی نوێوە دوژمنایەتیی خۆی نیشان داوە، هەربۆیە ئێران بەردەوام دەبێت لە بەرگریكردن لە سەروەریی و بەرژەوەندییە نیشتمانییەكانی خۆی.

هەروەها وەزیری دەرەوەی ئێران داوای دروستكردنی میكانیزمی ئەمنیی ناوچەیی سەربەخۆ لە دەستوەردانی دەرەكی كرد.