ئێران داوا لە وڵاتانی جیهان دەكات پابەندی سزاكانی ئەمریكا نەبن

پەیام 

وەزارەتی دەرەوەی ئێران داوا لە وڵاتانی جیهان دەكات پابەندی سزاكانی ئەمریكا نەبن و بە نایاسایییان دەزانێت.

وەزارەتی دەرەوەی ئێران لە بەیاننامەیەكدا گەمارۆی ئابووری ئەمریكای كە بە"تیرۆری ئابووری" ناو هێناوە، شەرمەزار كرد و ڕایگەیاند، هەموو دەوڵەتان ئەركدارن كە خۆیان لە جێبەجێكردنی سزاكانی واشنتۆن بەدوور بگرن.

تاران جەخت دەكاتەوە كە بەشداریكردن لەو سزایانەدا، بەواتای هاوكاریكردنە لە سەپاندنی ویستێكی نایاسایی و تێكدانی پەیوەندییە ئابوورییە شەرعییەكانی نێوان وڵاتان.

لە بەیاننامەكەدا هاتووە كە سزاكانی ئەمریكا پێشێلكارییەكی ڕوونی جاڕنامەی نەتەوە یەكگرتووەكان و مافەكانی مرۆڤن، بۆیە هیچ وڵاتێك نابێت دان بە ئاسەوارەكانیاندا بنێت. 

هاوكات، ئێران هەوڵەكانی ئەمریكا بۆ گۆشەگیركردنی ئابووری وڵاتەكەی وەك دەستوەردان لە كاروباری ناوخۆ دەبینێت. 

دوێنێش لە نامەیەكی فەرمیدا بۆ نەتەوە یەكگرتووەكان و ئەنجومەنی ئاسایش، تاران داوای كردووە كە فشار بخرێتە سەر ئەمریكا تاوەكو كۆتایی بە هەڕەشە و كردارە زۆرەملێیەكانی ئاراستەی وڵاتانی سێیەم بهێنێت.