ئەمریکا لە هێرشەکانی بۆ سەر ئێران ئاهەنگێکی هاوسەرگیری بۆردومان کرد و دەیان منداڵ بریندار بوون

پەیام

لە هێرشێکی ئەمریکادا بۆ سەر ئاهەنگێکی هاوسەرگیری لە ناوچەی کوهستەکی باشووری ئێران، پێنج کەس کوژران و ٥٠ کەسی دیکەش بریندار بوون کە زیاتر لە ١٥یان منداڵن. 

ئەحمەد نەفیسی، جێگری پارێزگاری هورمزگان بۆ کاروباری سیاسی، ئەمنی و کۆمەڵایەتی، ڕایگەیاند هێرشەکە ئاهەنگێکی لە شارۆچکەی کوهستەک سەر بە دوورگەی سیریک لە پارێزگای هورمزگان کردووەتە ئامانج. 

لەبارەی ئاماری زیانە گیانییەکانەوە، نەفیسی ئاماژەی بەوە کرد تا ئێستا پێنج کەس بەهۆی هێرشەکەوە گیانیان لەدەستداوە و ٥٠ کەسی دیکەش بریندار بوون. هەروەها ڕوونیکردەوە کە لەنێو بریندارەکاندا زیاتر لە ١٥ منداڵ هەن کە لەو کاتەدا بەشداریی ئاهەنگەکەیان کردبوو. 

ئەو بەرپرسە ئێرانییە پێشبینیی ئەوەی کرد کە ژمارەی قوربانییەکان بەرز ببێتەوە، ئەمەش بەهۆی ئەوەی کە باری تەندروستیی بەشێک لە بریندارەکان زۆر ناجێگیرە و لە دۆخێکی مەترسیداردان. 

لەبەرانبەردا، سوپای پاسدارانی ئێران ڕاگەیەنراوێکی بڵاو کردەوە و دەڵێت، وەڵامی زۆر توندی هێرشەکەی ئەمریکا بۆسەر ئەو ئاهەنگە دەدەنەوە، هاوکات ئیبراهیم عەزیزی، سەرۆکی لیژنەی ئاسایشی نیشتیمانی لە ئەنجومەنی شوورای ئیسلامی ئێران رایگەیاند، هێرشەکەی ئەمریکا بۆسەر ئەو ئاهەنگی هاوسەرگیرییە دەرخەری ئەوەیە کە ئەمریکا لە هێرشەکانیدا هیچ بەهایەکی سەربازی و مرۆیی لەبەرچاو ناگرێت.