پاكستان: نیگه‌رانین له‌ پێكدادانه‌ سه‌ربازییه‌كان و له‌ هه‌وڵی دیبلۆماسی به‌رده‌وام ده‌بین

په‌یام

پاکستان ڕایگەیاند بەردەوامە لە هەوڵەکانی بۆ کەمکردنەوەی گرژییەکان و چارەسەرکردنی ناکۆکییەکانی نێوان ئەمریکا و ئێران، ئەمەش لە ڕێگەی زنجیرەیەک کۆبوونەوەی دیپلۆماسیی باڵاوە لەگەڵ بەرپرسانی تاران و وڵاتانی ناوچەکە. 

وتەبێژی وەزارەتی دەرەوەی پاکستان ئاماژەی بەوە کرد وڵاتەکەی لەگەڵ وڵاتانی دۆستدا سەرقاڵی دۆزینەوەی چارەسەرێکە بۆ کێشەکانی ئەمریکا و ئێران. لەم چوارچێوەیەدا، شەهباز شەریف، سەرۆکوەزیرانی پاکستان، لەم دواییانەدا لە بیشکێکی پایتەختی قیرغیزستان لەگەڵ سەرۆککۆماری ئێران کۆبووەتەوە. هاوکات، ئیسحاق دار، وەزیری دەرەوەی پاکستان، لە پەراوێزی کۆبوونەوەی ڕێککەوتنی مەککە لەگەڵ هاوتا ئێرانییەکەی کۆبووەتەوە و تاوتوێی دۆخەکەیان کردووە. 

سەبارەت بە سەردانی هەفتەی ڕابردووی فەرماندەی سوپای پاکستان بۆ ئێران، وتەبێژەکە ڕوونی کردەوە کە ئەو هەنگاوە بەشێک بووە لە هەوڵەکانی ئیسلام ئاباد بۆ کەمکردنەوەی ئاڵۆزییەکان، گەڕان بەدوای ڕێگەکانی هێورکردنەوەی دۆخەکە و هەروەها کردنەوەی گەرووی هورمز. 

لە کۆتاییدا وەزارەتی دەرەوەی پاکستان جەختی لەوە کردەوە کە سەرەڕای پەرەسەندنە نوێیەکان، ئیسلام ئاباد هێشتا ئومێدەوارە و بەردەوام دەبێت لە هاندانی لایەنەکان بۆ پشت بەستن بە دیالۆگ و دیپلۆماسی بۆ گەیشتن بە چارەسەرێکی گونجاو.