پێدەچێت سەرۆکانی ئەمریکا، ڕووسیا و چین پێکەوە کۆ ببنەوە

پەیام

بڕیارە لە لوتکەی داهاتووی ئەی پیکدا، سەرۆکانی ڕووسیا، ئەمریکا و چین کۆبوونەوەیەکی سێقۆڵی ئەنجام بدەن. 

یوری ئوشاکۆڤ، یاریدەدەری کۆشکی کرێملین، ڕایگەیاند، ڤلادیمیر پووتین، دۆناڵد ترامپ و شی جین پینگ، ئەگەری هەیە لە لوتکەی داهاتووی ڕێکخراوی هاریکاریی ئابووریی ئاسیا و زەریای هێمن (ئەی پیک) لە مانگی تشرینی دووەمی داهاتوودا کۆبوونەوەیەکی سێقۆڵی ئەنجام بدەن. 
ئوشاکۆڤ ڕوونیکردەوە بابەتەکە تاوتوێ کراوە و چاوەڕوان دەکرێت هەرسێ سەرۆک بەشداری لوتکەکە بکەن، ئەگەر دۆخەکەش بەو شێوەیە بێت، ئەوا دەرفەتی سازدانی کۆبوونەوەکە دەڕەخسێت. 

ڕووسیا، چین و ئەمریکا ئەندامن لە ڕێکخراوی ئەی پیک کە لە ٢١ وڵات پێکدێت. بڕیاریشە ڕۆژانی ١٨ و ١٩ی تشرینی دووەمی داهاتوو، شاری شێنجێنی چین میوانداریی لوتکەکە بکات. لەبەرانبەردا، ئانا کێلی، وتەبێژی کۆشکی سپی، ڕایگەیاند لە ئێستادا هیچ ڕاگەیەندراوێکی فەرمییان سەبارەت بە بەشداریکردنی دۆناڵد ترامپ لە لوتکەی ئەی پیک نییە.