میسر... لە ڕووداوێکی هاتووچۆدا ٢١ کەس گیانیان لەدەست دا

پەیام
بەرەبەیانی ڕۆژی چوارشەممە، بەهۆی وەرگەڕانی پاسێکەوە لە پارێزگای باشووری سینا لە میسر، ٢١ کەس گیانیان لەدەستدا و ژمارەیەکی تریش برینداربوون، کە ١٠ کەسیان هاووڵاتیی ئوردونین. 

وەزارەتی تەندروستیی میسر بڵاویکردەوە، پاسەکە ٤٣ سەرنشینی هەڵگرتبوو کە ٢٢ کەسیان هاووڵاتیی ئوردونی بوون، و لە ئەنجامی ڕووداوەکەدا ٢١ کەس گیانیان لەدەستداوە و ١٠ کەسیان لە نێو قوربانییەکاندا ئوردونین. 

حوسام عەبدولغەفار، وتەبێژی فەرمیی وەزارەتی تەندروستیی میسر، ڕایگەیاند دەستبەجێ دوای پێگەیشتنی هەواڵی ڕووداوەکە، ژووری ئۆپەراسیۆنە ناوەندییەکان چالاک کراوە. لە سەرەتادا گیانلەدەستدانی ١٦ کەس و برینداربوونی ٢٨ کەس ڕاگەیەندرا، کە سەرجەمیان بۆ وەرگرتنی چارەسەر و چاودێریی پزیشکیی پێویست گواسترانەوە بۆ نەخۆشخانە، بەڵام دواتر ئاماری قوربانییان بۆ ٢١ گیانلەدەستدان بەرزبووەوە. 

لای خۆیەوە، کەناڵی فەرمیی «مەملەکە»ی ئوردونی لە هەواڵێکی بەپەلەدا پشتڕاستی کردەوە کە لە کۆی گشتیی قوربانییەکانی ڕووداوەکە، ١٠ کەسیان هاووڵاتیی وڵاتەکەیانن. بەپێی زانیارییەکانی کەناڵەکە، کۆی ژمارەی سەرنشینانی پاسەکە ٤٣ کەس بووە کە ٢٢ کەسیان لە ڕەگەزنامەی ئوردونی بوون.