نیویورک تایمز: بەڵگەکان دەریانخستووە کە ئەمریکا بۆردومانی ئاهەنگەکەی باشووری ئێرانی کردووە

پەیام

بەپێی لێکۆڵینەوەیەکی ڕۆژنامەی نیویورک تایمز، ئەوە پشتڕاست کراوەتەوە کە هێزی ئاسمانیی ئەمریکی بۆمبێکی ئاڕاستەی ئاهەنگێکی هاوسەرگیری لە باشووری ئێران کردووە، کە بووە هۆی کوژران و برینداربوونی ژمارەیەک هاووڵاتیی مەدەنی. 

بەپێی ڕۆژنامە ئەمریکییەکە لەدوای لێکۆڵینەوەیەکی ورد، بەڵگەی بینراو و پاشماوەی چەکەکان دەریخستووە هێرشە ئاسمانییەکەی ئەمریکا باڵەخانەیەکی نێو ناوچەیەکی نیشتەجێبوونی لە شاری کۆهەستک کردووەتە ئامانج؛ شوێنێک کە ئاهەنگی هاوسەرگیریی تێدا بەڕێوەچووە و زیانی گیانی لێکەوتووەتەوە. 

لێکۆڵینەوەکە پشتی بە کۆمەڵێک گرتە و وێنەی شوێنی ڕووداوەکە، لەگەڵ شاهیدی دانیشتووان و بەرپرسانی ناوخۆیی شارەکە بەستووە و، لە کۆتاییدا دەرکەوتووە کە ئەمریکا بۆردومانی ئاهەنگەکەی کردووە. 

سەرەڕای ئەوەش، تریڤۆر بۆڵ، شارەزای سەربازی و چەک، بۆ ڕۆژنامەکەی ڕوونکردووەتەوە کە پاشماوەی چەکە دەرکەوتووەکان لە شوێنی هێرشەکەدا بە تەواوی لەگەڵ پێکهاتەی بۆمبێکی ئەمریکی یەکدەگرنەوە کە تەنها لەلایەن فەرماندەیی ناوەندیی ئەمریکاوە بەکاردەهێنرێن و هێزە ئێرانییەکان خاوەنی نیین. 

هێرشەکان لە شاری کۆهەستک چەند شوێنێکیان پێکاوە، لەوانە تاوەرێکی گەورەی پەیوەندی لە نزیک بەندەری شارەکە و ئەو شوێنەی کە ئاهەنگەکەی تێدا سازکرابوو.