ئەمریکا ئەو پارانەى کە بە ئۆكرانیا و ناتۆى داوە لە ئەوروپاى وەردەگرێتەوە

پەیام 

دۆناڵد ترەمپ سەرۆكی ئەمریكا ڕایگەیاند، كە وڵاتەكەی خاوەنی كۆگایەكی گەورەی تەقەمەنییە و بە ئاستێكی بێپێشینە چەك بەرهەم دەهێنێت، جەختیشی كردەوە كە واشنتن لە ئێستادا تەقەمەنییەكان بۆ خۆی دەپارێزێت و پارەی هاوكارییەكانی ئۆكرانیا و ناتۆ لە ئەوروپا وەردەگرێتەوە.

دۆناڵد ترەمپ، سەرۆكی ویلایەتە یەكگرتووەكانی ئەمریكا، جەختی لەوە كردەوە كە وڵاتەكەی خاوەنی كۆگایەكی زەبەلاحی تەقەمەنییە و ئاماژەی بەوە كرد، كە ئەمریكا بە ئاستێكی بێپێشینە چەك و تەقەمەنی بەرهەم دەهێنێت.

ترەمپ ڕایگەیاندووە، كە وڵاتەكەی بڕێكی نزیك لە "بێسنوور" تەقەمەنی جۆرایەتی بەرز و مامناوەندی هەیە و كار بۆ كۆگاكردن و ئامادەباشی بۆ هەر بارودۆخێكی لەناكاو یان جەنگێكی ئەگەری دەكەن.

ئاماژەی بەوەش كرد كە واشنتن بڕیاری داوە لە ئێستادا تەقەمەنییەكان بۆ خۆی بپارێزێت نەك بیفرۆشێتە لایەنی تر، بەڵام فرۆشتنی چەك بە هاوپەیمانان بەم زووانە دەست پێ دەكاتەوە. 

ترەمپ ڕەخنەی لە ئیدارەی جۆ بایدن گرت و وتی، بڕی ئەو تەقەمەنییانەی دراوە بە ئۆكرانیا زۆر زیاترە لەوەی ئەمریكا لە ئۆپەراسیۆنە سەربازییەكانی دژی ئێران بەكاری هێناوە.

هەروەها وتی ئەمریكا سەدان ملیار دۆلار هاوكاریی پێشكەش بە ئۆكرانیا و ناتۆ كردووە و داوای گەڕاندنەوەی ئەو پارانە لە ئەوروپا دەكات، هەرچەندە پێیوایە گەڕانەوەی ئەو پارانە دواكەوتووە.