بەتۆمەتی بێڕێزیكردن بە ئەردۆغان، داودئۆغڵو دادگایی دەكرێت

پەیام 

بەتۆمەتی بێڕێزیكردن بە ڕەجەب تەیب ئەردۆغان لە وتەیەكدا، ئەحمەد داودئۆغڵۆ وەزیری دەرەوەی پێشووی توركیا دادگایی دەكرێت..

داواكاری گشتیی توركیا، دەستپێكردنی لێكۆڵینەوەیەكی یاسایی دژی ئەحمەد داودئۆغڵو، وەزیری دەرەوەی پێشووی توركیا ڕاگەیاند. ئەم هەنگاوە دوای بڵاوكردنەوەی لێدوانێكی داودئۆغڵو لە تۆڕە كۆمەڵایەتییەكان دێت، كە بە سووكایەتیكردن بە ڕەجەب تەیب ئەردۆغان، سەرۆك كۆماری توركیا لەقەڵەم دراوە لەلایەن هاوپەیمانەكەی پێشووی ئەردۆغانەوە.
داودئۆغڵووی تەمەن 67 ساڵ، پێشتر یەكێك بووە لە كەسایەتییە هەرە دیارەكانی پارتی داد و گەشەپێدان (AKP). ناوبراو لە ساڵانی نێوان 2009 و 2014 پۆستی وەزیری دەرەوەی هەبووە و دواتر تا ساڵی 2016 وەك سەرۆك وەزیران كاری كردووە. ئەو كات بەهۆی ناكۆكی لەگەڵ ئەردۆغان لەبارەی گۆڕانكارییەكانی ناو دەستوور و زیادكردنی دەسەڵاتەكانی سەرۆك كۆمار، دەستی لەكاركێشایەوە و جیابووەوە.

لە ساڵی 2019دا داودئۆغڵوو پارتی ئایندەی دامەزراند، بەڵام نەیتوانی لە هەڵبژاردنەكاندا پێگەیەكی بەهێز بەدەستبهێنێت، تا دواجار لە ئابی ئەمساڵدا هەڵوەشاندنەوەی پارتەكەی ڕاگەیاند.