ئێران: بەڕێوەبردنی گەرووی هورمز هەرگیز وەك پێش شەڕی لێ نایەتەوە

پەیام

عەباس عەراقچی، وەزیری دەرەوەی ئێران هۆشداری دا كە ڕێڕەوەكانی دەریاوانی و شێوازی بەڕێوەبردنی گەرووی هورمز هەرگیز بۆ دۆخی پێش جەنگ ناگەڕێنەوە، و ڕاگرتنی شەڕیش بەندە بە وەستانی پێكدادان لە سەرجەم بەرەكاندا.
لە لێدوانێكدا بۆ میدیاكانی وڵاتەكەی، عەباس عەراقچی، وەزیری دەرەوەی ئێران ئاشكرای كرد كە سیستەمی ئەمنیی ناوچەكە كە پشتی بە دەستوەردانی بیانی بەستبوو داڕماوە، و بنكە سەربازییەكانی ئەمریكا نەك ئارامییان دروست نەكرد، بەڵكو بوونە هۆكاری ناسەقامگیری.
عەراقچی جەختی كردەوە كە شێوازی بەڕێوەبردن و ڕێڕەوەكانی پەڕینەوە بە گەرووی هورمزدا هەرگیز ناگەڕێنەوە بۆ دۆخی پێش سەرهەڵدانی جەنگ، هاوكات ڕایگەیاند كە گەیشتن بە ئاگربەست تەنیا لە ڕێگەی وەستانی تەواوەتیی پێكدادان لە هەموو بەرەكان و كۆتاییهێنان بە گەمارۆی ئابووری مسۆگەر دەبێت.
وەزیری دەرەوەی ئێران ئامادەیی تارانی بۆ هاوكاری لەگەڵ دەوڵەتانی ناوچەكە بەتایبەت وڵاتانی كەنداو دەربڕی لەسەر بنەمای پشتبەستن بە توانای خۆبەخۆ و دوور لە دەستوەردانی دەرەكی و پێشوازی لە هەر هەوڵێك كرد بۆ ڕێككەوتن، هۆشداریشیدا ئەوانەی ئەنجامی پێكدادانەكانی ڕابردوویان بینیوە جارێكی دیكە پەنا بۆ شەڕی سەربازی دژ بە ئێران نابەن و دوو ئەزموونی ڕابردوو نیشانیدا كە ئێران بژاردەی جیاوازی لە بەردەستدایە.