دوای 9 ڕۆژ لە لافاوەكەی نیپاڵ دوو كرێكار بە زیندوویی ڕزگار كران

پەیام 

دوای تێپەڕبوونی نۆ ڕۆژ بەسەر لافاوە كارەساتبارەكەی نیپاڵ، تیمەكانی فریاگوزاری توانییان دوو كرێكار بە زیندوویی لەناو تونێلێكی وێستگەی كارەبادا ڕزگار بكەن. 

وتەبێژی سوپای نیپاڵ ڕایگەیاند كە ئەو دوو كرێكارە لەناو تونێلێكی پڕۆژەی كارەبای ئاوییەوە دەرهێنراون و دەستبەجێ پشكنینی پزیشكییان بۆ كراوە. ئەم ڕووداوە هیوایەكی گەورەی بۆ تیمەكانی فریاگوزاری دروست كردووە كە ڕەنگە كەسانی دیكەش بە زیندوویی مابن. 

بەپێی زانیارییەكان، گەیشتن بە دەروازەی تونێلەكە زۆر سەخت بووە و شەش ڕۆژی خایاندووە، چونكە تەواوی دەروازەكە بە بەرد و قوڕ گیرابوو، پاشانیش تیمەكان ناچار بوون ئاوەكە دەربهێنن و ئۆكسجین بنێرنە ژوورەوە. 

ئەمە لە كاتێكدایە كە دەسەڵاتداران پێشبینی دەكەن نزیكەی 900 كرێكار لە 12 پڕۆژەی كارەبای ئاویدا بێسەروشوێن بن، كە گومان دەكرێت 500 كەسیان  لە كاتی ڕووداوەكەدا لەناو تونێلەكاندا گیریان خواردبێت. 

بەرپرسانی نیپاڵ ئەم لافاوەیان بە ڕووداوێكی وێرانكەر ناو بردووە كە پێدەچێت بەهۆی داڕمانی سەهۆڵبەندێكەوە دروست بووبێت. ئەمەش تا ئێستا گیانلەدەستدانی هەزار و 270 كەسی لێ كەوتووەتەوە و هەزاران كەسیش بێسەروشوێنن.